АҚШ президенти Барак Обама вице-президент Жозеф Байденга ўғлини саратон хасталигидан даволатишш учун молиявий ёрдам таклиф этган. Бу ҳақда Байден CNN телеканалига берган интервьюсида маълум қилди, дея хабар беради «ТАСС».
Обама ва вице-президент ўртасидаги суҳбат улар биргаликда тушлик қилаётганда бўлиб ўтган. Байден катта ўғли Бо оғир касаллик туфайли Делавер штати бош прокурорлигидан кетишига тўғри келиши, уни даволатишга эса катта маблағ зарурлигини билдирган.
«Мен бунинг чорасини топганим, турмуш ўртоғим Жилл билан уйни сотиб, вазиятдан чиқишимизни айтдим. Президент эса асло бундай қилмаслигимизни уқтириб, исталган ёрдам, жумладан, пул бериб туришни таклиф этган. Мен президент томонидан кўрсатилган хайрихоҳлик учун жуда миннатдорман ва буни ҳеч қачон унутмасам керак», — дея хотирлаган Байден.
Бо Байден 2015 йил майда 46 ёшида мия саратонидан вафот этди. Бу Жозеф Байден учун яқинларини яна бир марта йўқотиш бўлди: 1972 йили унинг биринчи хотини ва бир ёшдан ошган қизи автоҳалокатда нобуд бўлганди. Ўғлининг ўлими сабабли ҳам Байден АҚШ президентлигига сайловларда иштирок этишдан бош тортганди.
Изоҳ (0)