Февраль ойида АҚШ президенти Жо Байденнинг кўкрак қисмидаги терисидан саратон ўсимтаси олиб ташланди. Бу ҳақда Оқ уй шифокори Кевин О'Коннорнинг мактубида айтилади.
Байденнинг шифокори айтишича, операциядан кейин президентнинг териси яхши битган, биопсия (зарарланган тўқимани кесиб олиб текшириш) эса бу одамларда кенг тарқалган базал ҳужайрали карсинома эканини кўрсатган. Шифокор давомий муолажа талаб қилинмаслигини таъкидлади.
“Биопсия жойи яхши битиб кетди, президент кенг қамровли тиббий ёрдам доирасида дерматологик кузатувда бўлишни давом эттиради”, — деб ёзади O'Коннор ўз мактубида.
Унинг таъкидлашича, бу ўсимта бошқа жиддийроқ тери саратони каби тарқалиб кетмайди ёки метастаз бермайди.
Январь ойи ўрталарида Жо Байденнинг рафиқаси Жилл жарроҳлик амалиётини ўтказганди — биринчи хонимдан тери саратони ўсмалари олиб ташланган. Жилл Байденга ҳам базал ҳужайрали карсинома ташхиси қўйилган.
Февраль ойида Жо Байден президент лавозимида кейинги муддатда ишлашга “лойиқ” деб топилгани хабар қилинганди. Американинг 80 ёшли етакчиси Уолтер Рид номидаги Миллий ҳарбий тиббиёт марказида уч соатлик тиббий кўрикдан муваффақиятли ўтган.
Байден 2024 йилги президентлик сайловларида иштирок этиш ҳақида ўйламоқда. Унинг сўзларига кўра, ёш ва соғлиги бунга тўсқинлик қилмайди.
Изоҳ (0)