Россиянинг Санкт Петербург шаҳрида “Слава Украини! Героям слава!” деб бақирган фуқаро Василиса Магрицкая 7 суткага қамалди. Бу ҳақда Meduza хабар берди.
Ҳодиса 11 апрель куни Art Hall кафесида ўтказилган “Йўқлик” номли ҳарбий-маърифий спектаклда юз берган. Аёл “экстремистик” рамзларни оммавий намойиш қилиш ва майда безориликда айбланган. Петроградский туман суди унга қарши маъмурий қамоқ жазосини тайинлаган.
Таъкидланишича, Магрицкая спектаклдаги олқишлар чоғида шундай шиорни айтган. Судда кўриб чиқилган баённомага кўра, у “жамоат жойида сўкиниб гапирган” ва огоҳлантиришларга эътибор бермаган. Аёл судда айбини тан олмаган.
“Йўқлик” спектакли Россияда яшовчи ва Россиянинг Украинага бостириб киришини қўллаб-қувватловчи украиналик шоира Евгения Билченконинг сценарийси асосида саҳналаштирилган.
“Слава Украини!” (Украинага шон-шараф!) ва унга жавобан “Героям слава!” (Қаҳрамонларга шон-шараф!) шиорлари узоқ тарихга эга. 2022 йилнинг февраль ойида Россиянинг Украинага кенг кўламли босқини бошланганидан буён “Слава Украини!” шиоридан Ғарб сиёсатчилари ҳам Украинани қўллаб-қувватлашини билдириш учун кенг фойдалана бошлади.
Бу шиорни турли вақтларда Буюк Британиянинг собиқ бош вазири Борис Жонсон, Канада бош вазири Жастин Трюдо ва Польша президенти Анжей Дуда ишлатган. Шунингдек, АҚШ собиқ президенти Жо Байден босқиннинг бир йиллиги муносабати билан Киевга қилган тарихий ташрифи чоғида Мариинский саройининг меҳмонлар китобига ушбу шиорни ёзиб қолдирган.
Изоҳ (0)