Buyuk Britaniya qiroli Charlz III prostata bezining kattalashishi tufayli kasalxonaga yotqizilganida saraton kasalligi aniqlandi. Bu haqda Bukingem saroyi matbuot xizmati xabar berdi.
“Janobi oliylari bugun muntazam muolajalarni boshladi, shifokorlar unga jamoat oldida turgan vazifalarni kechiktirishni maslahat berdi. Bu davr mobaynida oliy hazratlari davlat ishlari va rasmiy hujjatlarni yuritishda davom etadi”, — deyiladi bayonotda.
Bukingem saroyining qayd etishicha, qirol o‘zining davolanishiga ijobiy munosabatda va imkon qadar tezroq davlat oldidagi majburiyatlarini o‘tash uchun qaytishga umid qilmoqda.
“Janobi oliylari mish-mishlarning oldini olish uchun va bu butun dunyo bo‘ylab saraton kasalligidan aziyat chekayotganlarni tushunishga yordam beradi, degan umidda o‘z tashxisi bilan bo‘lishishga qaror qildi”, — deyilgan bayonotda.
Yanvar oyi o‘rtalarida Bukingem saroyi Charlz III prostata bezining kengayishidan davolanishini eʼlon qildi. U 26-yanvar kuni kasalxonaga yotqizilgan va shu kuni monarx jarrohlik amaliyotini o‘tkazgan. Amaliyot muvaffaqiyatli o‘tgan. 29-yanvar kuni Charlz III kasalxonadan chiqdi, ammo shifokorlar sog‘ayib ketishi uchun unga ommaviy tadbirlarni bir necha kunga qoldirishni maslahat berdi.
Charlz III 75 yoshda. U 2022-yil sentyabrida onasi Yelizaveta II vafotidan keyin Buyuk Britaniyaning yangi qiroli bo‘ldi. Monarx emlanganiga qaramay, ikki marta, 2020 va 2022-yillarda koronavirus bilan kasallangan.
Izoh (0)