Жанубий Корея армиясидаги аскарлар сони охирги олти йил ичида 20 фоизга қисқарди. Бунга мамлакатда ҳарбий хизматга чақириладиган эркакларнинг кескин камайиши сабаб бўлган. Бу ҳақда Reuters агентлиги хабар берди.
Жанубий Корея Мудофаа вазирлигининг ҳисоботига кўра, ҳарбий хизматга чақириладиган эркаклар сонининг кескин камайиши офицерлар етишмовчилигига ҳам олиб келмоқда. Бу жараён давом этадиган бўлса, қуролли кучларда турли хил қийинчиликлар юзага келиши мумкин.
Мазкур ҳисобот ҳукмрон Демократик партия депутати Чу Ми-аега тақдим этилган бўлиб, унинг офиси ҳисоботни оммага эълон қилган.
Қайд этилишича, Жанубий Корея армияси 2000 йилларнинг бошларидан бошлаб мунтазам равишда қисқариб келмоқда. Ўша даврда аскарлар сони тахминан 690 мингни ташкил этган. 2019 йилда фаол хизматдаги аскар ва офицерлар сони қарийб 563 минг нафарни ташкил қилган. Қисқариш суръати 2010 йилларнинг охирида тезлашиб кетган.
Ҳукумат маълумотларига кўра, 2019 йилдан 2025 йилгача 20 ёшли эркаклар сони 30 фоизга камайиб, 230 минг кишига тушган. Аксарият эркаклар шу ёшда тиббий кўрикдан ўтиб, 18 ой давом этадиган мажбурий ҳарбий хизматга киришади.
1953 йилда Корея уруши якунланганидан сўнг, ҳар бир кореялик 36 ой муддатга ҳарбий хизматга жўнатилган. Бироқ ҳозирда мажбурий хизмат муддати 18 ойга туширилган. Бунга АҚШ билан ҳарбий соҳадаги кенг ҳамкорлик ва мудофаа саноатини ривожлантириш орқали эришилган.
2025 йилда Жанубий Корея мудофаа бюджети 43,9 миллиард АҚШ долларидан ошади. Бу рақам Шимолий Кореянинг бутун иқтисодиётининг кўрсаткичидан ҳам каттароқдир.
Мамлакат Мудофаа вазирлиги армияда хавфсизликни сақлаш учун етарли бўлган сондан 50 минг аскар камлигини билдирган. Ҳозирнинг ўзида Жанубий Корея қуролли кучларига 21 минг нафар кичик сержант етишмайди.
Жанубий Корея дунёдаги энг тез қариб бораётган жамиятлардан бири бўлиб, 2024 йилда туғилиш коэффициенти 0,75 га тенг. Яъни кореялик ҳар бир аёлдан ўртача бир нафардан ҳам кам фарзанд кутилади. Ҳукуматнинг билдиришича, 2020 йилда 51,8 миллионга етган мамлакат аҳолиси 2072 йилга келиб 36,2 миллионга тушади.
Изоҳ (0)