AQSH sobiq prezidenti Jo Baydenda prostata bezi saratonining agressiv shakli aniqlandi. Bu haqda uning matbuot kotibiga tayanib, The New York Times xabar berdi.
Sog‘liqdagi muammo 16-may kuni shifokorlar Baydenni peshob chiqarish bilan bog‘liq muammolar tufayli tekshirganida aniqlangan. Tashxis prostata bezida “qo‘shimcha tekshiruv” talab qiladigan “kichik tugun” borligi aniqlaganidan so‘ng qo‘yilgan. Metastazlar allaqachon suyaklarga tarqalgan. Unga Glisson shkalasi bo‘yicha 9 ball bilan tavsiflangan prostata saratoni tashxisi qo‘yilgan.
Garchi bu kasallikning agressiv shakli bo‘lsa-da, saraton gormonlarga sezgir ko‘rinadi, bu esa uni samarali davolash imkonini beradi, deyiladi matbuot kotibi bayonotida.
Bayden va uning oilasi shifokorlar bilan birgalikda davolash variantlarini ko‘rib chiqmoqda.
Jo Bayden 82 yoshda, u lavozimini tark etayotganda AQSHning eng keksa prezidenti bo‘lgan. 2024-yili u ikkinchi prezidentlik muddatiga nomzodini qo‘ymoqchi edi, ammo keyin vitse-prezident Kamala Harris nomzodini qo‘llab-quvvatladi. Bunday qarorning sabablaridan biri Baydenning sog‘lig‘i bilan bog‘liq muammolar tufayli bildirilgan fikrlar edi.
Ma’lumot o‘rnida, 14-may kuni qizilo‘ngach saratoni tashxisi aniqlangan Urugvay sobiq prezidenti Xose Muxika 89 yoshida vafot etgandi. Davlat rahbari sifatida u juda kamtarona hayot kechirgan. Rafiqasi bilan qishloq uyida yashagan va deyarli barcha maoshini xayriya ishlariga sarflagan. Shu sababli OAVda uni “dunyodagi eng qashshoq prezident” deb atay boshlashgandi.
2024-yil fevral oyida Britaniya qiroli Charlz III ga saraton kasalligi tashxisi qo‘yilgandi. U rasmiy vazifalarini bajarishda davom etmoqda. Qirollik oilasining yana bir a’zosi — Uels malikasi Ketrin (Keyt Middlton) ham saraton kasalligiga chalingan.
Izoh (0)