АҚШ президенти Дональд Трамп ядровий давлатларни ядро қуролидан воз кечишга чақирди ва Россия ҳамда Хитой билан ядросизланиш бўйича музокараларга умид билдирди. Бу ҳақда Newsweek хабар берди.
Трампдан Франция президенти Эммануэл Макроннинг Европа давлатларига Франциянинг ядровий ҳимоясини таклиф қилишга тайёрлиги ҳақидаги баёнотига изоҳ бериш сўралган.
Агар ҳамма ўз ядро қуролидан халос бўлса, жуда яхши бўларди. Биласизми, Россия ва АҚШда, шубҳасиз, энг кўп жанговар каллаклар бор. Хитойда ҳам тўрт-беш йил ичида шунча қурол бўлади. Агар барчамиз ядро қуролларидан халос бўлишни амалга ошира олсак, жуда яхши бўларди, чунки ядро қуролининг кучи ақл бовар қилмайдиган даражада даҳшатли, деди Трамп.
АҚШ президенти таъкидлашича, у ўзининг биринчи президентлик муддати давомида ядросизланиш дастурини амалга оширишга ҳаракат қилган ва Россия билан музокараларда бу масалада “жуда олдинга силжиган”. Шунингдек, буни Хитой раҳбари Си Цзиньпин билан муҳокама қилган. Трампнинг айтишича, Си Цзиньпин “бунга розилик беришдан жуда мамнун бўларди”.
Аммо АҚШ раҳбари кейинчалик “ёмон воқеалар содир бўлгани”ни айтди. Унга кўра, 2020 йилги президентлик сайловларида Жо Байден ғалаба қозонди.
Шу сабабли, тўрт йилдан сўнг бу масалага қайтишга мажбур бўлдик. Аммо мен бу музокараларни бошлашни жуда истардим, деди у.
Америка олимлари федерацияси (FAS) маълумотларига кўра, 12 мингдан ортиқ ядро каллаклари мавжуд. Уларнинг 90 фоизи Россия ва АҚШ ҳиссасига тўғри келади. 2024 йил август ҳолатига кўра, Россияда 5580 та, АҚШда эса 5044 та ядровий каллак бор. Бошқа давлатларнинг ядро каллаклари сони эса суратда акс этган.
Изоҳ (0)