Time журнали АҚШнинг сайланган президенти Дональд Трампни “Йил одами” деб топди. У бу мақомга даъвогар миллиардер Илон Маск, малика Кейт Миддлтон ва мухолифатчи Юлия Навальнаяни ортда қолдирди.
Time нашри 1927 йилдан бери “Йил одами”ни эълон қилади. Рейтингни йил давомида матбуот сарлавҳаларига энг катта таъсир кўрсатган “шахс, шахслар гуруҳи ёки ҳодиса” бошқаради. 2022 йилда “Йил одами” унвонини президент Владимир Зеленский, 2023 йилда эса америкалик хонанда Тейлор Свифт қўлга киритганди.
Трампнинг сиёсий қайта туғилиши Америка тарихида мисли кўрилмаган ҳодисадир. Унинг биринчи муддати шармандалик билан тугади, 2020 йилги сайлов натижаларини бекор қилишга уринишлари АҚШ Капитолийсига ҳужум билан якун топди. 2022 йил охирида бир нечта жиноий терговлар давом этаётган пайтда у ўз номзодини эълон қилганида, аксарият партия амалдорлари ундан юз ўгирди, дейилади сиёсатчига берилган таърифда.
Бироқ Трамп кейинчалик партиянинг праймеризида ғалаба қозонди ва президентликка номзод бўлди. Бундан ташқари, у июль ойида суиқасддан, кейинроқ эса яна бир суиқасдга уринишдан азият чекди.
5 ноябрь куни у президентлик сайловларида ғалаба қозониб, АҚШ тарихида аввалги сайловларда мағлубиятга учраганидан кейин Оқ уйга қайтишга муваффақ бўлган иккинчи собиқ давлат раҳбарига айланди. Бунга қадар демократ Гровер Кливленд бунга муваффақ бўлганди. 1888 йилда у иккинчи муддатга сайлана олмаган, аммо тўрт йилдан сўнг ғалаба қозонганди.
Трампдан ташқари “Йил одами” унвонига жами ўн киши номзод бўлган:
- АҚШ вице-президенти Камала Ҳаррис, Жо Байден пойгадан чиқиб кетганидан кейин давлат раҳбари лавозими учун курашга киришган ва Трампга ютқазган;
- SpaceX ва Tesla асосчиси, АҚШ президентининг янги маъмуриятида иш бошлайдиган миллиардер Илон Маск;
- Бу йил саратон касаллиги аниқланган ва кимётерапия курсини ўтаган Уэлс маликаси Кейт Миддлтон;
- Алексей Навальнийнинг беваси Юлия Навальная;
- Исроил бош вазири Биньямин Нетаньяху;
- Федерал захира тизими раҳбари Жером Пауэлл;
- Америкалик комик ва подкаст бошловчиси Жо Роган;
- Мексика тарихида биринчи аёл президент Клаудия Шейнбаум;
- “Мета” раҳбари Марк Цукерберг.
Улардан Цукерберг (2010), Трамп (2016), Ҳаррис (2020; Байден билан бирга) ва Маск (2021) аввалроқ “Йил одами” деб топилган.
Изоҳ (0)