АҚШ ҳукумати мигрантларни синчковлик билан текшириш доирасида айрим тоифаларнинг, жумладан, қочқинларнинг “грин карта” учун берган аризаларини кўриб чиқишни вақтинча тўхтатди. Бу ҳақда Ички ишлар вазирлигига таяниб, CBS хабар берди.
АҚШ Фуқаролик ва иммиграция хизмати (USCIS) қочқинлар ёки бошпана мақомига эга мигрантлар томонидан юборилган аризаларни кўриб чиқишни тўхтатиш бўйича кўрсатма берган. Бу қарор президент Дональд Трамп томонидан илгари имзоланган икки фармонни бажариш доирасида қабул қилинган.
Биринчиси “АҚШга кирмоқчи бўлган ёки аллақачон унинг ҳудудидаги чет элликларни имкон қадар синчковлик билан текширишни” назарда тутади. Иккинчи фармон эса Давлат департаментига Мексика картеллари ва жиноий гуруҳларини террорчи ташкилотлар деб эълон қилиш имконини беради.
Трамп маъмурияти АҚШ фуқаролиги, “грин карта” ва бошпана олиш учун ариза топширган мигрантларнинг ижтимоий тармоқлардаги аккаунтларини ҳам текширмоқчи. USCIS бу “шахсни чуқурроқ текшириш, қўшимча хавфсизлик чораларини кўриш ва миллий хавфсизликни таъминлаш” учун зарур деб ҳисоблайди.
“Грин карта” аризаларини кўриб чиқишни тўхтатиш Трамп маъмуриятининг иммиграция тартибларини кучайтиришга қаратилган навбатдаги қадами бўлди.
Февраль ойида АҚШ Украина фуқароларидан миграция аризаларини қабул қилишни тўхтатди. Чекловлар Байден маъмуриятининг хорижликларга гуманитар сабабларга кўра АҚШда вақтинча қолишга рухсат берган бир нечта дастурларини қамраб олади. Бу Лотин Америкаси фуқароларига ҳам алоқадор.
Трамп АҚШнинг иммиграция сиёсатини қатъийлаштириш тарафдори эканини бир неча бор таъкидлаган. У 20 январь куни президентлик лавозимига киришганидан сўнг Мексика билан чегарада фавқулодда ҳолат жорий этди. Шунингдек, Ички хавфсизлик вазирлиги Америка ҳуқуқ-тартибот идоралари ваколатларини кенгайтириб, уларга ноқонуний муҳожирларни иммиграция судининг қарорисиз, “тезлаштирилган тартиб” орқали депортация қилиш имконини берди.
“Грин карта” доимий яшаш ҳуқуқини тасдиқловчи ва АҚШ фуқароси бўлмаган шахсларга мамлакатда ишлашга рухсат берувчи шахсни тасдиқловчи ҳужжат.
Бундай карта эгаси АҚШ фуқаросига деярли тенглаштирилади — у исталган штатда яшаши ва ишлаши, кўчмас мулкка эга бўлиши, давлат мактабида ўқиши, нафақа олиши, мамлакатдан чиқиб кетиши ва қайтиб келиши мумкин. Аммо сайловларда қатнаша олмайди. Шунингдек, у солиқ тўлаши ва чақирув ёшидаги эркак бўлса, ҳарбий рўйхатга туриши шарт. Беш йил ўтгач, “грин карта” АҚШ фуқаролигини олиш имкониятини очади.
Маълумот учун, АҚШнинг Тошкентдаги элчихонаси DV-2023 (грин-карта) дастури орқали иммиграцион визаларни тақдим этиш бўйича дунёда 7-ўринни эгаллаган. 2023 йил ноябрь маълумотларига кўра, АҚШда ўтган икки йил ичида чегарани ноқонуний кесиб ўтишга уринган 13 мингдан ортиқ Ўзбекистон фуқароси қўлга олинган.
Изоҳ (0)