АҚШ президенти Дональд Трамп Ғазо секторидаги гаровдагиларнинг барини озод қилишни талаб қилганидан сўнг ҲАМАС вакили бунга жавоб қайтарди. Бу ҳақда Al Arabiya хабар берди.
ҲАМАСга кўра, бундай таҳдидлар Исроил бош вазири Биньямин Нетаньяхунинг Ғазода ўт очишни тўхтатиш режимидан чиқишини ва қамални кучайтиришини қўллаб-қувватлашни англатади.
Трамп 5 март куни ҲАМАСдан “барча гаровга олинганларни, жумладан, ҳалок бўлган гаровдагилар жасадини “кейинроқ эмас, ҳозироқ озод қилишни” талаб қилди.
Қолган исроиллик маҳбусларни озод қилишнинг энг самарали йўли — келишувнинг иккинчи босқичига ўтиш ва воситачилар ҳомийлигида имзоланган келишувга риоя қилишга мажбурлашдир, дейди ҲАМАС вакили Абдул-Латиф ал-Қануа.
Январь ойида кучга кирган Ғазодаги тинчлик келишуви Трампнинг элчиси ва истеъфога чиқаётган Байден маъмурияти вакиллари иштирокида муҳокама қилинди. Келишувга кўра, қолган гаровдагилар иккинчи босқичда озод этилиши, шу пайтда урушни якунлаш бўйича сўнгги режалар ишлаб чиқилиши керак.
Тинчлик келишувининг биринчи босқичи 2 март куни якунланди. Шундан сўнг Исроил Ғазога гуманитар ёрдам киришини тўлиқ тақиқлади. ҲАМАСдан урушни тугатиш бўйича музокараларни бошламасдан туриб, қолган гаровдагиларни озод қилишни талаб қилди. Тақиқ Ғазо вайроналарида яшовчи 2,3 миллион аҳоли орасида очарчиликка олиб келиши мумкин.
АҚШ президенти таҳдиди
Трамп гаровга олинганлар озод этилмаса, бу ҲАМАСга қимматга тушишини айтган.
Танлов сизнинг қўлингизда. Барча гаровдагиларни ҳозироқ, кечиктирмасдан озод қилинг ва ўлдирилган одамларнинг жасадларини дарҳол қайтариб беринг, акс ҳолда сизга жуда ёмон бўлади. Мен Исроилга ишни якунлаш учун керак бўлган ҳамма нарсани юбормоқдаман.
Агар айтганимни қилмасангиз, ҲАМАСнинг бирорта аъзоси ҳам омон қолмайди. Мен ҳозиргина сиз ҳаётини издан чиқарган собиқ гаровдагилар билан учрашиб келдим. Бу сизга охирги огоҳлантириш! Раҳбарият учун энди Ғазони тарк этиш вақти келди, ҳали имкониятингиз бор. Ғазо халқига эса: сизни ажойиб келажак кутмоқда, лекин гаровдагиларни ушлаб турсангиз, бу сизга насиб этмайди, дея таҳдид қилди у.
Маълумот ўрнида, Трамп 42 кун ичида Исроилга 12 млрд долларлик ҳарбий ёрдам юборди. АҚШ президенти хорижий ёрдам дастурларини молиялаштиришни тўхтатгани фонида Исроилга ёрдам кўрсатишда давом этмоқда. 3 март куни Трамп Украинага ҳар қандай ёрдамни тўхтатган эди.
Изоҳ (0)