АҚШда республикачилар вакили бўлган конгрессмен Рон Райт коронавирус инфекциясини юқтириб олганидан кейин вафот этди. У COVID-19 қурбонига айланган АҚШ конгрессининг энг биринчи аъзоси ҳисобланади, деб ёзмоқда The Hill.
«Конгрессмен Рон Райт 2021 йил 7 февраль куни 67 ёшида вафот этди», — дейилган АҚШ конгрессининг хабарномасида.
Райт 21 январда коронавирусга топширган таҳлили «мусбат» натижа кўрсатганидан икки ҳафта ўтгач ҳаётдан кўз юмган. Унда коронавирус аниқланган вақтда конгрессмен касалликнинг белгилари сезилар-сезилмас даражада эканлиги ва ўзини яхши ҳис этаётгани, уйдан туриб, масофадан ишлашга тайёрлиги ҳақида гапирганди.
Нашрнинг қайд этишича, 2020 йил сентябрь ойида Райт саратон муолажасидан кейинги асоратлар туфайли касалхонада маълум вақт даволанган.
Райт АҚШ вакиллар палатасининг хорижий ишлар ҳамда меҳнат ва таълим қўмиталари аъзоси бўлган.
Мавзуга доир: Жо Байден пандемия туфайли ишини йўқотган фуқарога қўнғироқ қилиб, иқтисодиётни ривожлантириш режалари ҳақида гапириб берди
Январь охирида АҚШ Конгресси Вакиллар палатаси аъзоси Стивен Линч (Массачусетс штатидан демократ), белгиланганидек, вакцинанинг иккита дозасини олиб бўлганидан кейин коронавирусга чалинганди. Шунингдек, АҚШда коронавирус тарқалиши секинлашгани, кейинроқ эса COVID-19’ни тезкор аниқлаш тестини яратган америкалик иммунологнинг вафот этгани ҳақида хабар берилган.
Изоҳ (0)