АҚШ ҳарбий ёрдамисиз Украина ҳозирги суръатда ёзгача жанг қилиш учун етарли қурол-аслаҳага эга. Бу ҳақда Ғарбнинг собиқ ва ҳозирги амалдорларига таяниб, The Wall Street Journal хабар берди.
Пентагоннинг собиқ амалдори Селеста Уолландернинг айтишича, Жо Байден маъмурияти томонидан сўнгги ойларда юборилган ёки буюртма қилинган йирик етказиб беришлар Украинага камида йил ўрталаригача етиши керак.
Ҳарбийларга дронлар етказиб берувчи Украинанинг Come Back Alive ташкилоти катта таҳлилчиси Николай Белесковнинг фикрича, бу кетишда армия “олти ой ёки бир йил” давомида бардош бериши мумкин. Кейин эса Европа томонидан зарур ўқ-дорилар ишлаб чиқарилишига умид қилишига тўғри келади.
Украина президенти Владимир Зеленскийнинг ёрдамчиси (исми келтирилмаган) АҚШнинг ҳарбий ёрдамни тўхтатишини “энг ёмон сценарий” деб баҳолади. Бундай ҳолда Украина ўз ҳарбий ишлаб чиқаришини кенгайтириши ва Европа давлатларидан кўпроқ ёрдам олиши керак бўлади.
АҚШ томонидан ҳарбий таъминот тўхтатилган тақдирда, Киев ўқ-дориларсиз қолиши ва энг замонавий қуроллардан фойдалана олмаслиги мумкин.
Украинада қурол ишлаб чиқариш суръати
Ҳозирда Украина ҳарбий техниканинг қарийб 55 фоизини ишлаб чиқаради ёки молиялаштиради. Ғарб амалдорининг сўзларига кўра, техниканинг 25 фоизини Европа ва 20 фоизга яқинини АҚШ етказиб беради. Аммо Американинг илғор ҳаво ҳужумидан мудофаа тизимлари, “ер-ер” синфидаги баллистик ракеталари, навигация тизимлари ва узоқ масофали ракета артиллериясини ўз ичига олган баъзи таъминотларини қисқа муддатда алмаштириш амалда имконсиз. Европа уларни етарлича ёки умуман ишлаб чиқармайди.
Шунга қарамай, Европа тақчилликни тўлдиришга ҳаракат қилишга тайёрланмоқда. 2024 йилда Европа Иттифоқи, Буюк Британия ва Норвегия Украинага жами 25 миллиард долларлик қурол ва ўқ-дорилар етказиб бергани, бу АҚШ таъминотидан ҳам кўпроқ экани айтилмоқда.
Изоҳ (0)