“Қумтор” конида 261 тонна олтин захираси борлиги маълум қилинди. Бу ҳақда табиий ресурслар, экология ва техник назорат вазири Медер Машиев маълум қилди.
“Қумтор”да қолган олтин захираси тахминан 127 тонна эди. 2024 йил ва ундан олдин ўтказилган геология-қидирув ишлари натижаларига кўра, Фойдали қазилмалар захиралари бўйича давлат комиссияси йиғилишида 147,5 тонна олтин захирага қўшилди. Натижада “Қумтор”нинг ҳозирги захираси 261 тоннани ташкил этмоқда, деди Машиев.
Бироқ Медер Машиев айтган 127 ва 147 тонна қўшилса, 274 тонна чиқади. Аммо вазир бу тафовут ҳақида батафсил маълумот бермаган.
Qumtor Gold компанияси 2024 йилда 12,5 тонна олтин қазиб олишни режалаштирган. Бугунги кунга қадар қанча олтин қазиб олингани ҳақида маълумот йўқ. 2023 йилда эса “Қумтор” компанияси режалаштирилган 14 тонна ўрнига 13 тонна 567 килограмм олтин қазиб олган.
Қирғизистон ҳукумати Канаданинг Centerrа Gold компанияси томонидан эксплуатация қилинаётган “Қумтор” конини 2021 йил май ойида ўз назоратига олган ва узоқ давом этган тортишувдан сўнг 2022 йил апрель ойида уни тўлиқ қўлга киритган. Бунинг эвазига Қирғизистон Centerrа Gold’нинг 26 фоиз акцияларини берган ва барча экологик ҳамда молиявий даъволардан воз кечган.
Машиев 100 тоннадан ортиқ олтин захирасига эга “Чаарат” конини 2-3 йилдан кейин ўзлаштириш бошланишини маълум қилди. Унинг сўзларига кўра, “Чаарат” кони тўлиқ геология-қидирувдан ўтган ва тасдиқланган захиралар 100 тоннадан ортиқ олтинни ташкил этган.
Лицензиат британиялик компания (Chaarat Zaav) ҳисобаланади. Йил охирида улар билан учрашув ўтказиб, талабларимизни билдирдик. Компания қазиб олиш ишларини кейинги 2-3 йил ичида бошлашни режалаштирмоқда, деди вазир.
Чаарат кони Жалолобод вилояти, Чатқол туманида жойлашган бўлиб, уни қазиб олиш лицензияси Chaarat Zaav компаниясига тегишли. Қирғизистон собиқ вазирлар маҳкамаси раиси Оқилбек Жапаров 1994 йилдан 2021 йилнинг майигача мамлакат “Қумтор” фаолиятидан 100 миллион доллар дивиденд олгани, 400 тонна олтин экспорт қилинганини айтганди.
Изоҳ (0)