Қирғизистон пойтахти Бишкек полицияси 2016 йилда Туркия фуқароларига ноқонуний равишда паспортлар берилгани юзасидан коррупция ҳақидаги модда бўйича судгача тергов бошлади, деб ёзади «РБК» Республика Ички ишлар вазирлигига таяниб.
«Суриштирув чоғида аниқланишича, 2016 йилда Туркиянинг ўн нафар фуқаросини Қирғизистон Республикаси фуқаролигига қабул қилиш ҳақида ноқонуний қарор чиқарилган», — дейилади муассаса хабарида.
Қирғизистон Жиноят кодексининг коррупция ҳақидаги 319-моддаси 15 йилгача муддатга озодликдан маҳрум қилиш шаклидаги максимал жазони кўзда тутади. Агар қонунбузарлик жиноий гуруҳ манфаатлари йўлида амалга оширилган бўлса, шундай чора танланади.
Шунингдек, ИИВ аниқлик киритишича, ҳужжатларни ноқонуний тарзда тақдим этиш қарори мамлакат президенти қошидаги Фуқаролик масалалари бўйича комиссия томонидан қабул қилинган, давлат раҳбари эса қарорни тасдиқлаган. Қирғизистонга ўша вақтда Алмазбек Атамбаев раҳбарлик қилган.
Айни пайтда терговчилар жиноятга алоқадор шахсларни аниқлаштирмоқда.
Бир кун аввал Бишкек полицияси турли вақтларда чет элликларга мамлакат паспортлари берилишини текшириш билан шуғулланишини маълум қилганди. ИИВ қайд этишича, қидирилаётган шахсларга, чет элликларга ва уюшган жиноий гуруҳлар аъзоларига ҳужжатлар тақдим этиш билан боғлиқ коррупция ва ваколатларни суиистеъмол қилиш ҳолатлари бир неча марта аниқланган. Хусусан, Туркия ҳукумати томонидан 2016 йилги тўнтаришга уринишга алоқадорликда айбланган Ўрхан Инанди қонунга зид тарзда ҳужжатга эга бўлган.
Алмазбек Атамбаев 2011 йилдан 2017 йилгача Қирғизистонга раҳбарлик қилган. Ўтган йилнинг июнида суд жиноий авторитетнинг ноқонуний равишда озод этилиши ҳақидаги иш бўйича собиқ президентни 11 йил-у 2 ойга озодликдан маҳрум этган эди. 2020 йил охирида Республика Олий суди бу қарорни бекор қилди.
Алмазбек Атамбаевга қарши бир нечта жиноий ишлар қўзғатилган, жумладан, у ҳуқуқ-тартибот идоралари ходимларига нисбатан зўравонлик, оммавий тартибсизликларни ташкил қилиш, қотилликни ташкиллаштириш, одамларни гаровга олишни ташкил қилиш, коррупция ҳамда Қўй-Тош қишлоғи ва Иссиқкўл вилоятидаги ерларни ноқонуний равишда ўзлаштирганликда айбланган. Шунингдек, Алмазбек Атамбаев қотилликда ҳам гумон қилинган.
Аввалига Атамбаев Бишкекдаги 1-сонли тергов изоляторига жойлаштирилган, январь ойида эса Қирғизистон собиқ президенти тергов изоляторидан колонияга ўтказилган.
2021 йил июнида собиқ президентнинг адвокати унинг аҳволи оғир эканини айтиб, уни зудлик билан касалхонага ётқизишни талаб қилган эди.
Эслатиб ўтамиз, Қирғизистоннинг биринчи ва иккинчи президентлари Асқар Акаев ва Қурманбек Бакиевлар мамлакатдаги энг йирик олтин кони бўлган «Қумтор» иши бўйича халқаро қидирувга берилди.
Изоҳ (0)