«Қумтор» олтин кони узил-кесил Қирғизистон тасарруфига ўтди

Қумтор олтин кони Қирғизистон тасарруфига ўтди, деб ёзади «Интерфакс» республика президенти матбуот хизматига таяниб.

«29 июль куни Қирғизистоннинг Буюк Британиядаги элчихонасида Қумтор олтин конининг республика тасарруфига ўтиши жараёнини тасдиқловчи ҳужжатлар билан айирбошлаш бўлиб ўтди», — дейилади хабарда.

Матбуот хизматига кўра, Қирғизистон элчихонаси ҳудудида томонларнинг халқаро ҳуқуқий вакиллари ва эскроу агент иштирокида Қирғизистоннинг Буюк Британиядаги элчиси Улан Жусуповга юридик ҳужжатларнинг тўлиқ пакети, шу жумладан, «Кумтор Голд Компани» ва «Кумтор Оперейтинг Компани» компаниялари акцияларининг 100 фоизига нисбатан мулк ҳуқуқини «Қирғизолтин» ОАЖ фойдасига тўлиқ ўтказилишини расмийлаштириш учун зарур бўлган узатиш актлари, ишончномалар ва гувоҳномалар топширилди.

«Шунингдек, келишувда кўзда тутилган Қирғизистон фойдасига молиявий тўловларнинг барчаси амалга оширилди», — дейилади матбуот хизмати хабарида.

Эришилган битимга кўра, Қумтор кони тўлиқ республика тасарруфига ўтмоқда. Шу билан бирга, конда 2021 йил 15 майдан буён ишлаб чиқарилган олтин Қирғизистон мулк ҳуқуқига киради.

Бундан ташқари, Centerra Gold Inc. қарийб 11 миллион доллар миқдорида дивидендларни тўлайди. Шунингдек, Канада компанияси томонидан Қирғизистон томонига 50 миллион доллар ҳажмида бир марталик тўлов ҳақида келишилган. Қирғизистон ихтиёрига Қумтор кони бўйича Рекультивация жамғармаси устидан бошқарув ҳам Қирғизистонга ўтмоқда, унинг ҳажми қарийб 53 миллион доллар бўлиб, у Қирғизистон банкларидан биридаги махсус ҳисобга ўтказилади.

Шу билан бирга, Centerra Gold Inc. АҚШ, Швеция ва Канадада бошланган барча суд жараёнларини тўхтатади.

Centerra Gold Inc. «Қирғизолтин» ва Қирғизистон ҳукумати билан битим тузгани ҳақида шу йилнинг 4 апрелида мамлакат президенти Садир Жапаров маълум қилган эди.

Қумтор — Қирғизистондаги энг йирик хорижий инвестиция лойиҳаларидан бири бўлиб, 2020 йилда унинг улушига Centerra Gold Inc. даромадининг 60 фоизи тўғри келган. Канада компанияси 2009 йилда ҳукумат билан тузилган келишувга мувофиқ, конга «Кумтор Голд Компани» ЁАЖ шўъба корхонаси орқали эгалик қилган ва уни бошқарган.

2021 йил майида Қирғизистон ҳукумати Марказий Осиёдаги энг йирикларидан бири бўлиб ҳисобланувчи Қумтор кони ишлаб чиқарувчиси «Кумтор Голд Компани» ЁАЖга экологик ва солиқ қонунчилигини бузганлик учун 3 миллиард доллардан ортиқ суммага молиявий норозилик билдирган эди. Шундан кейин конга нисбатан ташқи бошқарув жорий этилди.

Centerra Gold Inc. Қирғизистон ҳукумати хатти-ҳаракатларига эътироз билдириш учун халқаро арбитражни бошлади, «Кумтор Год Компани» эса 31 май куни банкротлик тўғрисида ариза берди. Унинг маълум қилишича, Қумтор устидан назоратнинг йўқотилишидан етган зарар 926,4 миллион долларга баҳоланмоқда.