Қирғизистон собиқ президенти Асқар Акаев журналистлар билан мулоқот қилиб, Бишкекка қайтиб келиши сабаблари ҳақида гапириб берди.
«Мен республика раҳбариятидан, Садир Нургожоевичдан ватанимга қайтиб келиш имкониятини тақдим этгани учун жуда миннатдорман. Мен ҳамкорлик қилиш, ёрдам бериш учун келдим. ‘Қумтор’ лойиҳаси бўйича менга нисбатан даъволар борлигини билардим. У менинг давримда қурилган. Мен терговга ёрдамлашиб, кўрсатмаларимни бериш истагидаман. Қўмита (Давлат миллий хавфсизлик қўмитаси) раисидан миннатдорман. Жуда эътибор билан муносабатда бўлишди. Саволлар бор, мен биринчи сўроқдан ўтдим. Мен ‘Қумтор’ни қандай қурганимиз, нима учун қурганимиз, қандай хатоликлар бўлгани ҳақида чин дилдан, самимий гапириб бериш учун келдим», — деди Асқар Акаев.
У эндигина иш билан танишиб чиққанини айтди. Давлат миллий хавфсизлик қўмитаси биносида терговчилар билан учрашувлар давом этади.
«Келганингиз учун раҳмат айтаман, умид қиламанки, саломлашиб кўришиш учун келгансизлар. Мен бундан жуда хурсандман. Ўзимни жуда бахтли ҳис қиляпман, чунки 16 йил ўтиб, биринчи марта ватанимга, халқимнинг ёнига келдим… Ҳозир яхшиланиш ва гуллаб-яшнаш бўйича жараёнлар кетяпти, мен ёрдам бермоқчиман.
Мен бир ҳафтага учиб келдим. Агар улгурмасам, саволларга менинг адвокатим жавоб беради. Ҳа, мен қароргоҳда бўлиб, Садир Жапаров билан учрашдим, бу ерга келиш имконияти учун унга раҳмат айтдим, ‘Қумтор’ни муҳокама қилдик. Ҳеч қайси президентга нисбатан даъвойим йўқ, насиб бўлса, масалаларимни ҳал қилай, шунинг учун буни изоҳламайман… Бишкек жуда ўзгариб кетибди, яхши шаҳарга айланибди, бундан кейин ҳам шундай гулласин. Кўкаламзор шаҳримиз сақланиб қолибди», — деди Қирғизистон собиқ президенти.
Аввалроқ Қирғизистон Давлат миллий хавфсизлик қўмитаси Асқар Акаев қўмита биносида бўлиб, унинг иштирокида туғилган жойи бўйича жиноят иши доирасида зарур тергов ҳаракатлари олиб борилаётганини маълум қилган эди.
Қирғизистон Миллий хавфсизлик давлат қўмитасининг таъкидлашича, Акаев ва бошқа собиқ юқори мартабали амалдорлар 1992 йилда «Қумтор» лойиҳаси бўйича бош келишувни тузишда, 1994 йилда унга ўзгартиришлар киритишда, шунингдек, 2003 йилда «Камеко» компанияси билан келишувни қайта тузишда коррупция ҳолатлари учун жавобгарликка тортилган.
Қирғизистоннинг биринчи ва иккинчи президентлари Асқар Акаев ва Қурманбек Бакиевлар июль ойи бошларида «Қумтор» иши бўйича халқаро қидирувга берилганди.
Асқар Акаев 1990 йилдан 2005 йилгача дастлаб Қирғизистон ССР, сўнг Қирғизистон Республикаси президенти бўлган. 2005 йилда тўқнашувлар ва президент қароргоҳининг қирғин қилиниши воқеалари ҳамроҳлик қилган «Лолалар инқилоби» деб номланган даврда Қирғизистон президенти лавозимидан четлатилган, сўнг у Россияга қочиб кетган.
Изоҳ (0)