Қирғизистон собиқ президенти Курманбек Бакиев зарур бўлса, ўзининг иши бўйича суд жараёнларида онлайн режимида қатнашиб, терговчиларнинг барча саволларига жавоб беришга тайёрлигини маълум қилди, деб ёзади Asia Plus.
«Мен ҳар қандай халқаро судда қатнашишга тайёрман. Менинф исм-шарифим тарих саҳифаларида тоза бўлиб қолиши ва халқим олдида ўзимни оқлаш учун ҳамма нарсага тайёрман. Биздан кейин ҳам невараларим фамилиямни фахр билан олиб юришини хоҳлардим. Мен ҳақиқатдан қочмайдиган одамман, чунки адолатга ташнаман. Мен ҳатто ўзимга нисбатан суд қарорларини кўрганим ҳам йўқ. Аммо мамлакат раҳбарияти мен қаерда яшашимни билади. Ҳеч ким мендан ўзимга нисбатан айбловлар ҳақида сўрагани йўқ», — деди у.
Унинг сўзларига кўра, Қирғизистон ҳуқуқ-тартибот органлари бу борада Лондон судидан ўрнак олса бўларди.
«Бугунги кунда кўплаб мамлакатлар раҳбарлари бир-бири билан онлайн тарзда мулоқот қилмоқда. Нима учун Қирғизистонда худди Лондондагидек суд жараёни ўтказиш мумкин эмас экан? Истасак, бўлиши мумкин-ку. Ҳеч бўлмаса, жуда миннатдор бўлардим», — деди Бакиев.
Хусусан, у гапириб беришича, Лондонда, масалан, Шон Дейлининг даъвоси бўйича ўғли Максим Бакиевга нисбатан суд жараёни доирасида онлайн режимида судья томонидан сўроқ қилинган.
Қирғизистон иккинчи президентининг беш йиллик ҳукмронлиги сиёсий қотилликлар, мухолифатнинг таъқиб этилиши, коррупция ва уруғ-аймоқчилик бошқаруви билан ёдда қолди.
Бакиевнинг ҳокимияти 2010 йил 7 апрелда, апрель инқилоби юз берганидан кейин қулади. Хавфсизлик кучлари билан тўқнашувларда 87 нафар фуқаро ҳалок бўлди. Бакиевнинг ўзи оиласи билан Беларусга қочиб кетди ва ҳозиргача ўша ерда яшамоқда. Қирғизистонда унга ва қариндошларига нисбатан жиноий ишлар очилди. Собиқ давлат раҳбари сиртдан 30 йиллик колонияга ҳукм қилинган.
Эслатиб ўтамиз, 2021 йил июлида Қирғизистоннинг биринчи ва иккинчи президентлари Асқар Акаев ва Қурманбек Бакиевлар мамлакатдаги энг йирик олтин кони бўлган «Қумтор» иши бўйича халқаро қидирувга берилган эди.
Изоҳ (0)