Қирғизистон собиқ бош вазири Омурбек Бабанов Москвадаги операциядан сўнг Қирғизистонга қайтди. У чет элда даволаниш учун қамоқхонадан озод қилинганди

Қирғизистоннинг собиқ бош вазири Омурбек Бабанов Москвада жарроҳлик операциясини бошдан ўтказганидан сўнг, 5 сентябрь куни Қирғизистонга қайтиб келди. Бу ҳақда сиёсатчига яқин манбаларга таяниб, Kloop нашри хабар берди.

«У ўзини яхши ҳис қиляпти, соғлиғи қайта тикланмоқда », — деди манбалар.

Собиқ бош вазир Бабанов 5 август куни Москвага учиб кетганди. У чет элда даволаниш учун ГКНБ (Қирғизистон Республикаси Миллий хавфсизлик давлат қўмитаси) қамоқхонасидан озод қилинган. Маълум бўлишича, Қирғизистонда сиёсатчига ташхис қўйишнинг имкони бўлмаган.

Бабанов нима учун қамоқда эди?

«Республика» партияси етакчиси Омурбек Бабанов 2017 йилда президентликка номзодини қўйишини эълон қилди. У бутун сайлов кампанияси давомида мамлакатнинг ўша пайтдаги раҳбари Алмазбек Атамбаев қўллаб-қувватлаган Сўронбой Жээнбековнинг асосий рақиби эди.

Қирғизистоннинг энг бой одамлардан бири Омурбек Бабанов 2017 йилдан Москвада яшаган ва 2019 йилда мамлакатга қайтиб келиб, сиёсатга қайтмасликка ваъда берган. Бабановнинг сўзларига кўра, ушбу ваъдаси учун ҳукумат унга қарши очилган жиноий ишни тўхтатишга ваъда берган.

2021 йил 24 мартда Миллий хавфсизлик давлат қўмитаси Омурбек Бабановга қарши судга оширилган ишлар тўхтатилганини маълум қилди. Шу билан бирга, Бабанов «ихтиёрий ёрдам сифатида» давлат бюджетига 100 миллион сом (қарийб 1,2 миллион доллар) хайрия қиладиган бўлди.

ГКНБ таъкидлашича, Омурбек Бабанов ва унинг қариндошлари ўз хатти-ҳаракатлари билан давлат, юридик шахслар ва фуқароларнинг манфаатларига зарар етказишига оид далиллар топилмаган. Бироқ 31 май куни ГКНБ Бабановни ҳибсга олди, бу сафар у «Қумтор» лойиҳасини амалга оширишда коррупцияга йўл қўйганликда айбланди.

Сиёсатчининг ўзи унинг ҳибсга олинишини «бутунлай ноҳақлик» деб атади ва ўзини айбдор деб ҳисобламаслигини айтди.

27 июль куни Бишкекнинг Первомайский туман суди Бабановга нисбатан эҳтиёт чорасини ўзгартириб, унга чет элга учишга рухсат берди. Миллий хавфсизлик давлат қўмитаси хабарига кўра, сиёсатчининг соғлиғи ёмонлашгани муносабати билан шундай қарор қабул қилинган.

Бунгача ОАВда Бабанов ГКНБ тергов изоляторидан «Авиценна» хусусий клиникасига ўтказилгани ҳақида хабарлар тарқалганди.