Марокаш қироли Муҳаммад VI га товламачилик қилишда гумонланаётган икки нафар журналист суд олдида жавоб беради. Бу ҳақда Agence France-Presse (AFP) нашрига таяниб, «ТАСС» хабар берди.
Маълумотларга кўра, 2 февралдан бошлаб ҳакамлар шантаж қилишда айбланган Эрик Лоран ва Катрин Грасега қарши суд ишларини олиб бориш тўғрисида кўрсатма берган эди. Шу билан бирга, AFP’нинг ёзишича, улардан қўрқитиш айбловлари олиб ташланди.
Журналистлар 2015 йилнинг август ойида Париж шаҳрида қўлга олинган. Тергов-суриштирув ишлари натижасида тўпланган маълумотларга кўра, улар аввал Марокашнинг Франциядаги элчихонасига қироллик тўғрисида ва айнан қирол Муҳаммад VI ҳақида китоб ёзишда ёрдам беришларини сўраб мурожаат қилган. Қироллик уйи вакиллари билан учрашув чоғида журналистлар мақоланинг низоли характерга эга бўлишига ишора қилиб, 3 миллион евро эвазига уни чоп этмасликка ваъда берган.
Марокаш дипломатлари Франция ҳукуматига мурожаат қилгач, журналистлар билан Париждаги кафелардан бирида учрашув ташкил этишга қарор қилинган. Журналистлар келишилган пулни олаётганда қўлга олинган.
Лоран ва Грасе Франциянинг журналистик суриштирувлар билан шуғулланувчи таниқли журналистлари бўлиб, Лоран банк соҳасидаги кўзбўямачиликлар, нефть бизнеси, Яқин Шарқдаги сиёсат каби мавзулардаги бир нечта китоблар муаллифи ҳисобланади. Грасе эса Ливиянинг собиқ раҳбари Муаммар Каддафийнинг президентлик сайловларида Николя Саркози кампаниясини молиялаштиргани эҳтимоли тўғрисидаги жанжалли воқеа устида текшириш олиб борган.
Ҳар икки муаллиф аввал ҳам Марокаш мавзусига мурожаат қилиб, 2012 йилда Муҳаммад VI га жуда салбий тавсиф берилган китоб ёзган эди.
Мавзуга доир:
Изоҳ (0)