Ироқ 2003 йилдан буён миллий иқтисодиётнинг турли соҳаларида амалга оширилган коррупциявий битимлари туфайли тахминан бир триллион доллар йўқотди. Бу ҳақда мамлакат президенти Барҳам Солиҳнинг маълумотларига таяниб, «ТАСС» хабар берди.
«2003 йилдан то бугунга қадар коррупция сабабли Ироқ бир триллион доллар зарар кўрди», — деб таъкидлади Солиҳ, унинг сўзларини Alsumaria TV телеканали иқтибос қилиб келтирди.
Президент берган маълумотларга кўра, 20 йилдан камроқ вақт ичида мамлакат ташқарисидаги коррупциявий операциялар натижасида 150 миллиард доллар, шунингдек, нефть соҳасида эришилган ғайриқонуний келишувлар туфайли яна миллионлаб долларлар мамлакатдан олиб кетилган.
Коррупция ва терроризм бир-бирига боғлиқ ва бир хил мақсадга эга, деб ҳисоблайди Солиҳ. Шу муносабат билан Ироқ президенти мамлакат парламентига коррупция орқали даромад топиш тўғрисидаги қонун лойиҳасини тақдим этди. Ушбу қонун огоҳлантирувчи чоралар кўриш, ноқонуний йўл билан олинган маблағларни қайтариш, коррупцияда гумонланувчиларни суд ҳукмига топшириш кабиларни ўз ичига олади.
Ироқ президенти ИШИД террористик гуруҳига қарши курашиш учун халқаро иттифоқ намунасида коррупцияга қарши курашиш учун ҳам халқаро коалиция тузишга чақирди. Солиҳнинг сўзларига кўра, бу таклиф «бошқа давлатлар ва халқаро агентликлар билан келишувлар ва ҳамкорликлар, шунингдек, коррупцияни жиловлашда жаҳон тажрибасидан фойдаланиш орқали маблағларни қайтаришга қаратилган».
Мавзуга доир:
Изоҳ (0)