Қирғизистон ИИВ ички қўшинларининг қўмондони қарийб 400 минг доллар маблағни талон-торож қилишда айбланиб қўлга олинди

Қирғизистон Ички ишлар вазирлиги ички қўшинларининг қўмондони, полковник Исломбек Кенжеқулов қарийб 400 минг доллар маблағни талон-торож қилишда айбланиб қўлга олинди. Бу ҳақда республика Бош прокуратураси матбуот хизматига таяниб, «РИА Новости» хабар берди.

«Гумонланувчи (Кенжеқулов) ички қўшинларга етказилган 34 миллион сом миқдоридаги зарар бўйича аввалроқ қўзғатилган иш доирасида қўлга олинди», — деди матбуот хизмати вакили.

Бир ҳафта олдин Бош прокуратура Қирғизистон ИИВ ички қўшинларининг мансабдор шахслари томонидан маблағларни талон-торож қилиш бўйича коррупцион схема аниқлангани ҳақида хабар берганди.

Прокурор текшируви натижасида маълум бўлишича, ходимларга озиқ-овқат ва зарур ашёлар харид қилиш учун мўлжалланган 33 миллион 496 минг сом (тахминан, 400 минг доллар) пул қалбаки фирмаларнинг ҳисоб рақамларига ноқонуний равишда ўтказилган, сўнг ўзлаштириб олинган.

Мазкур ҳолат бўйича ички қўшинларнинг мансабдор шахсларига нисбатан Қирғизистон Жиноят кодексининг 337- (мансабини суиистеъмол қилиш), 209- (фирибгарлик), 210- (омонатга ишониб топширилган мулкни жуда катта ҳажмда ўзлаштириш ёки исроф қилиш), 346- (расмий ҳужжатларни қалбакилаштириш) ва 348- (бепарволик) моддалари билан жиноят иши қўзғатилган.

Kaktus.media хабарига кўра, Кенжеқулов ҳозирда Ҳарбий прокуратура томонидан сўроқ қилинмоқда.

Аввалроқ Kaktus.media мазкур иш бўйича бир неча айбланувчи 29 ноябрь куни мамлакатни тарк этишга муваффақ бўлгани ҳақида хабар берганди. Хусусан, улар — Дамир Эрмекбоев, Қодирбек Кубатов ва Нозгул Каленбекова сингари мансабдор шахслар. Маблағлар «Кося Атлант» МЧЖ ва «Аддик Компани» МЧЖга ўтказилган.

Кейинроқ ушбу иш бўйича ИИВ ички қўшинлари молия хизмати раҳбари Талант Жўрабеков қўлга олингани хабар берилди.