Қирғизистон собиқ президенти Асқар Акаев «Қумтор» иши бўйича яна Бишкекка келди

Қирғизистоннинг собиқ президенти Асқар Акаев Москвадан Бишкекка учиб келди. Бу ҳақда «АКИpress» ва 24.kg манбаларига таянган ҳолда, шунингдек, «Vesti.kg» собиқ давлат котиби Осмонакун Ибраимовга таяниб хабар берди.

«AКИpress» хабарига кўра, Акаев ва ўғли маҳаллий вақт билан 4:40 да (Тошкент вақти билан 3:40) Москва-Бишкек рейсида мамлакатга етиб келган.

Акаев Қирғизистонга бир йил ичида иккинчи марта ташриф буюрмоқда. Бундан аввал у мамлакатга август ойида келган ва минтақадаги энг йирик олтин кони Қумтор атрофидаги коррупция иши бўйича кўрсатма берган.

Собиқ бош вазир Феликс Куловнинг таъкидлашича, собиқ президент республикага ўз ихтиёри билан қайтган, Акаевнинг ўзи эса тергов билан ҳамкорлик қилишини айтди.

Олтин захираси 700 тоннага баҳоланаётган Қумтор кони бўйича иш конни қазиш ҳуқуқини 1992 йилда тендерсиз қўлга киритган Канаданинг «Камеко» компанияси билан боғлиқ. Мамлакат ҳуқуқ-тартибот идоралари келишувни Қирғизистон учун ноқулай, деб ҳисобламоқда. 2003 йилдаги битим ҳам коррупцияга учраган, деб ҳисобланади, чунки «Камеко» билан бош келишувни қайта тузиш натижасида Қирғизистоннинг қўшма корхонадаги улуши 25,7 фоизга кам баҳоланган.

Август ойида Акаев сўроқдан ўтгач, Қирғизистон Миллий хавфсизлик давлат қўмитаси мазкур иш бўйича мамлакатнинг собиқ бош вазири Темир Сариевни ҳибсга олди. Қўмитада маълум қилинишича, унинг хатти-ҳаракатлари Қирғизистонга «катта зарар» келтирган, чунки у Қумторда олтин қазиб олиш натижасида атроф-муҳитга етказилган зарар миқдорини бир неча миллион долларга камайтириб кўрсатган. «Қумтор» ишида Қирғизистон парламентининг депутатлари ва амалдорлар гумон қилинмоқда.

Асқар Акаев 1990 йилдан 2005 йилгача дастлаб Қирғизистон ССР, сўнг Қирғизистон Республикаси президенти бўлган. 2005 йилда тўқнашувлар ва президент қароргоҳининг қирғин қилиниши воқеалари ҳамроҳлик қилган «Лолалар инқилоби» деб номланган даврда Қирғизистон президенти лавозимидан четлатилган, сўнг у Россияга қочиб кетган.