Қирғизистон собиқ президенти Сўронбой Жээнбековнинг коррупцияда гумон қилинган укаси тергов изоляторидан озод этилди. Бу ҳақда Tengrinews хабар берди.
Бишкекнинг Первомайский туман суди матбуот хизмати хабарига кўра, Юқори Кенгаш (парламент) депутати Асилбек Жээнбековга нисбатан эҳтиёт чорасини ўзгартириш тўғрисидаги илтимоснома Қирғизистон Республикаси Миллий хавфсизлик давлат қўмитаси томонидан киритилган.
«Бишкек шаҳар Первомайский туман судининг 2021 йил 9 декабрдаги қарори билан А.Ш.Жээнбековга нисбатан илгари қўлланган қамоққа олиш тарзидаги эҳтиёт чораси бекор қилинди ва у суд залида ҳибсдан озод этилди», — дейилади туман суди хабарида.
Яна бир депутат Тўрабой Зулфиқоров ҳам озодликка чиқарилган.
Эслатиб ўтамиз, сиёсатчилар «Қумтор» бўйича жиноий иш доирасида қўлга олинганди.
8 декабрь куни Қирғизистон парламентида юқорида қайд этилган депутатларни жиноий жавобгарликка тортишни маъқуллаш юзасидан Қирғизистон Республикаси бош прокурорининг тақдимномаларини кўриб чиқиш бўйича махсус депутатлик комиссияси ишининг якунлари тўғрисида маълумотлар ўқиб эшиттирилди.
Мазкур комиссия раиси Канатбек Исаевнинг маълум қилишича, етарли ва асосли далиллар йўқлигини ҳисобга олиб, ушбу депутатлар зудлик билан озод этилиши ва уларни жиноий жавобгарликка тортиш тўхтатилиши зарур, деган хулосага келинган.
Комиссия хулосасини 94 нафар депутат қўллаб-қувватлаган, қарши овозлар бўлмаган.
Сентябрь ойида Қирғизистон собиқ бош вазири Жўмарт Оторбоев Қирғизистонда Қумтор конини қазишда «Қумтор кони бош режасининг атроф-муҳитга таъсирини баҳолаш жараёнида атроф-муҳитни муҳофаза қилиш давлат агентлиги комиссиясига босим ўтказганликда» айбланиб ҳибсга олинганди.
Бундан аввал Қирғизистон собиқ бош вазирлари Темир Сариев ва Омурбек Бабанов Қумтор иши бўйича ҳибсга олинганди. Шунингдек, Қирғизистоннинг биринчи ва иккинчи президентлари Асқар Акаев ва Қурманбек Бакиевлар июль ойи бошларида Қумтор иши бўйича халқаро қидирувга берилган.
Асқар Акаев 2 август куни Қирғизистонга қайтди. У йўл қўйган хатолари учун ҳамда «Қумтор» лойиҳасини амалга ошириш чоғида умидларни оқламагани учун қирғиз халқидан узр сўради. Қирғизистон собиқ президенти Қумтор иши бўйича Миллий хавфсизлик давлат қўмитасида сўроқ қилинганидан кейин мамлакатни яна тарк этди.
Изоҳ (0)