Қирғизистоннинг “Қумтор” конида 50 тоннадан ортиқ олтин бор. Бу ҳақда Қирғизистон Президент матбуот хизмати раҳбари Дайирбек Орунбековга таяниб, “Sputnik Қирғизистон” хабар берди.
Орунбеков “Қумтор” конининг мамлакат юрисдикциясига ўтишидан олдинги ва кейинги даромадларини солиштирди.
“Қумтор хорижий компания бошқарувида бўлган 28 йил давомида 410 тонна олтин қазиб олинди, аммо Қирғизистонга бир грамм ҳам ўтмади. Ўша йилларда Қирғизистон атиги 100 миллион доллар дивиденд олган. Қумтор давлатга ўтказилгандан кейин, аниқроғи, 2022–2023 йилларда республика 698,6 миллион доллар даромад олди. Бундан ташқари, омборларда 50 тоннадан ортиқ олтин бор”, — деди у.
2023 йилнинг ўн ойида Қирғизистон 805,4 миллион долларлик 12,8 тонна олтин экспорт қилди. Бир ой давомида бу кўрсаткич 2,9 тоннага ошган. Қимматбаҳо металлар экспортининг асосий ҳажми Швейцарияга тўғри келади. У ерга 665 миллион долларга 10,6 тонна олтин етказиб берилди.
Изоҳ (0)