Қирғизистонда яна икки нафар собиқ давлат амалдори коррупцияда айбланиб ҳибсга олинди

Қирғизистонда собиқ бош вазир Омурбек Бабанов «Қумтор» олтин қазиб олиш лойиҳасини амалга ошириш жараёнида коррупцияга қўл урганликда гумонланиб ҳибсга олинди. Бу ҳақда мамлакат Миллий хавфсизлик давлат қўмитасига таяниб, «Интерфакс» хабар берди.

Бунга қадар 26 январь куни яна бир собиқ бош вазир Муҳаммадкалий Абилгазиев «Қумтор» билан боғлиқ жиноий иш бўйича ҳибсга олинган эди.

Ўшанда Миллий хавфсизлик қўмитаси Абилгазиевни «Qumtor Gold Company» ЁАЖ (мамлакатдаги энг йирик олтин кони) ишлаб чиқарувчисига геологик қидирув ва олтин қазиб олиш учун қўшимча ҳудудларни бериш тўғрисидаги фармонни имзолаш айблаган. Тергов фармон ноқонуний ҳамда давлат ва фуқароларнинг манфаатларига зид равишда имзоланган деб ҳисоблайди. Абилгазиев ҳукуматни 2018 йилдан 2020 йил 15 июнгача бошқарган.

Миллий хавфсизлик давлат қўмитаси аниқлик киритишича, қўмита терговчилари, Бош прокуратура ва Ички ишлар вазирлиги «Қумтор» конини ривожлантиришнинг турли босқичларида коррупция фактларини текширишни давом эттирмоқда. Ҳозиргача турли мансабдор шахсларга нисбатан тўртта жиноий иш қўзғатилган, улар туфайли етказилган зарар 10 миллиард сомдан (946 151 доллар) ошади.

Бош прокуратура маълумотларига кўра, 1992 йилдан 2019 йилгача бўлган даврда «Қирғизолтин» ОАЖнинг айрим мансабдор шахслари ва раҳбарияти Канаданинг Cameco, Centerra Gold Inc. компаниялари вакиллари билан «ноқонуний ва барқарор алоқа ўрнатган», шунингдек, «Qumtor Operating Company» ЁАЖ ва «Qumtor Gold Company» ЁАЖ, «ноқонуний равишда моддий ва бошқа манфаатларни кўзлаб ‘Қумтор’ олтин конини ривожлантириш бўйича Қирғизистон учун ноқулай бўлган шартномалар тузган.»

«ТАСС» агентлигининг хабар беришича, Қирғизистон парламентининг собиқ раиси ва собиқ президент Сўронбай Жээнбековнинг укаси Асилбек Жээнбеков ҳам коррупцияда гумон қилиниб ҳибсга олинган.

Республика Миллий хавфсизлик давлат қўмитаси маҳаллий оммавий ахборот воситаларида Жээнбековнинг ҳибсга олингани тўғрисида пайдо бўлган хабарларни тасдиқлади.

Асилбек Жээнбеков Социал-демократик партиясидан Қирғизистон юқори кенгаши (парламент) депутати, шунингдек, 2011 йилдан 2016 йилгача қонун чиқарувчи орган спикери бўлган. У 2016 йил апрелида акасининг номзоди Қирғизистон бош вазири лавозимига  кўрсатилганидан кейин спикерликдан истеъфога чиққан Бир йил ўтиб, президент сайловларида Сўронбай Жээнбеков ғолиб бўлган.