Қирғизистон собиқ раҳбари Асқар Акаев парламентдан унга собиқ президент мақомини қайтариб беришни сўради. Бу ҳақда “АКИпресс” хабар берди.
Жўқорғи Кенеш конституциявий қўмитаси раҳбари Чўлпон Султонбекова унинг хати қўмитага 5 сентябрь куни келиб тушгани, ҳали уни чуқур ўрганиб чиқмаганини айтди. Султонбекова хат билан танишиб чиққач, уни фракция етакчиларига юборишини, сўнгра маслаҳатлашувлар ўтказилишини билдирди. У бу жуда узоқ жараёнлиги ва парламентнинг қандай қарор қабул қилиши номаълумлигини айтди.
Асқар Акаев Қирғизистонни мустақилликнинг илк йилларидан 2005 йилгача бошқарган. 2005 йил март ойида оммавий норозилик намойишлари ҳукумат алмашишига олиб келган. Ўшанда Акаев ва унинг оила аъзолари Қирғизистондан Москвага қочиб кетган. Кейинроқ президент истеъфога чиққан.
“Қумтор” олтин конини ўзлаштириш билан боғлиқ жиноят иши доирасида Асқар Акаевга 1992 йилда Cameco компанияси билан бош келишувни тузиш, 2003 йилда “Қумтор” лойиҳасини қайта ташкил этиш эпизодлари бўйича жиноятга шериклик қилиш, ҳокимият ёки мансаб ваколатларини суиистеъмол қилишда айблов эълон қилинди.
2010 йилда, апрель инқилобидан кейин Акаев Қирғизистоннинг собиқ президенти мақомидан маҳрум қилинганди.
2021 йилда у Қирғизистонга икки марта – “Қумтор” иши бўйича тергов доирасида Миллий хавфсизлик давлат қўмитасида сўроқ қилиш учун келган. Шундан сўнг у Москвага қайтиб кетган. Миллий хавфсизлик давлат қўмитаси маълумотларига кўра, Акаев жиноятни содир этишдаги айбини тўлиқ тан олган ва тергов билан фаол ҳамкорлик қилган. Унга нисбатан қўзғатилган жиноят иши даъво муддати ўтгани сабабли тўхтатилган.
Изоҳ (0)