Qirg‘iziston 2,5 yil ichida “Qumtor” oltin konidan 300 million dollar dividend oldi. Bu haqda Vazirlar mahkamasi raisi Oqilbek Japarovga tayanib, Sputnik xabar berdi.
Japarovning so‘zlariga ko‘ra, 1994-yildan 2021-yilning mayigacha mamlakat “Qumtor” faoliyatidan 100 million dollar dividend olgan, 400 tonna oltin eksport qilingan.
“O‘tgan 2,5 yil davomida 300 million dollar dividend oldik, bu davrda soliqlar, jumladan, majburiy to‘lovlar hisobiga 710,8 million dollar kelib tushdi”, — dedi Vazirlar mahkamasi rahbari.
Qirg‘iziston prezidenti matbuot xizmati rahbari Dayirbek Orunbekov 2023-yil dekabr oyida konda qancha oltin borligini aytgandi.
“Qumtor xorijiy kompaniya boshqaruvida bo‘lgan 28 yil davomida 410 tonna oltin qazib olindi, ammo Qirg‘izistonga bir gramm ham o‘tmadi. O‘sha yillarda Qirg‘iziston atigi 100 million dollar dividend olgan. Qumtor davlatga o‘tkazilgandan keyin, aniqrog‘i, 2022–2023-yillarda respublika 698,6 million dollar daromad oldi. Bundan tashqari, omborlarda 50 tonnadan ortiq oltin bor”, — degan Orunbekov.
Izoh (0)