Қирғизистондаги Қумтор олтин конини қазиш билан боғлиқ коррупция иши доирасида Канаданинг Centerра Gold Inc компанияси ҳамда «Qumtor Gold Kompani» ёпиқ акциядорлик жамиятининг собиқ раҳбарлари халқаро қидирувга берилди.
Қирғизистон Миллий хавфсизлик давлат қўмитаси (ГКНБ) матбуот хизматининг хабар беришича, тергов 2013 йилнинг декабрь ойида «Centerra Gold» ва «Qumtor Gold Kompani» ЁАЖнинг хориж фуқароларидан иборат раҳбарияти 200 миллион доллар маблағни ўзлаштиришга ва уни чет эл компанияси ҳисобига ўтказишга алоқадорлиги тўғрисида рад этиб бўлмайдиган далилларни қўлга киритган.
Тергов томонидан қуйидагилар сиртдан жиноий жавобгарликка тортилди ва қидирувга берилди:
- Centerra Gold компаниясининг собиқ президенти Ян Аткинсон;
- «Qumtor Gold Kompani» ЁАЖ собиқ президенти ва бошқарув раиси Майкл Фишер ва Андрей Сазанов;
- «Kumtor Operating Kompani» ЁАЖнинг молиявий масалалар бўйича собиқ вице-президенти Жон Сютер.
Аввалроқ «Қумтор» лойиҳасини амалга оширишда йўл қўйилган коррупция ишини тергов қилиш доирасида Қирғизистоннинг 19-бош вазири Жўмарт Оторбоев ҳибсга олинганди. Ундан аввал Қирғизистоннинг яна икки собиқ бош вазири Темир Сариев ва Омурбек Бабанов Қумтор иши бўйича ҳибсга олинган. Шунингдек, Қирғизистоннинг биринчи ва иккинчи президентлари Асқар Акаев ва Қурманбек Бакиевлар июль ойи бошларида Қумтор иши бўйича халқаро қидирувга берилган. Асқар Акаев 2 август куни Қирғизистонга қайтди. У Миллий хавфсизлик давлат қўмитасида сўроқ қилинганидан кейин мамлакатни яна тарк этди.
Май ойи охирида Қирғизистонда яна икки нафар собиқ давлат амалдори коррупцияда айбланиб ҳибсга олинган. Улардан бири Қирғизистон парламентининг собиқ раиси ва собиқ президент Сўронбай Жээнбековнинг укаси Асилбек Жээнбековдир.
Айни пайтда Қирғизистон Миллий хавфсизлик давлат қўмитаси Бош прокуратура билан биргаликда «Қумтор» лойиҳаси бўйича келишувларни бекор қилиш жараёнини бошлаган.
Изоҳ (0)