Қирғизистон президенти Садир Жапаров “Кабар” агентлигига берган интервьюсида митинглардан қўрқмаслигини айтди, деб ёзади ‘‘Sputnik.kg’’.
Давлат раҳбарига мамлакат митинглар ботқоғига тушиб қоладими, деган савол берилган. Сабаби аввалроқ Кемпиробод иши бўйича ҳибсга олинганларнинг тарафдорлари норозилик намойиши уюштириб, Рамазон ойи охирида улар озод қилинмаса, митинглар ўтказишини айтган эди.
Биз митинглардан қўрқмаймиз. Мен шахсий манфаатини кўзлаб акцияда қатнашганларни кўриб қочадиган ёки беркинадиган одам эмасман. Агар мен мамлакатни талон-торож қилганимда, яқинларимни юқори лавозимларга тайинлаганимда ва Қирғизистонни инқирозга олиб келганимда митинглардан қўрқишим мумкин эди. Аксинча, мен ва жамоам тинимсиз меҳнат қилмоқдамиз. Мамлакатни ботқоқдан зўрға олиб чиқдик, — дейди Жапаров.
Давлат раҳбари “авваллари юрт талон-торож қилинганда яхши эди” дейдиганларнинг бошини ҳеч ким силамаслигини айтган.
Жавоб кескин бўлади, чунки бизнинг ишимиз адолатли. Халқнинг кўпчилик қисми бизни қўллаб-қувватлайди, уларни эмас. Кўпчиликка бўйсуниш лозим, — дея қўшимча қилган у.
Маълумот учун:
2012 йил октябрь ойида Садир Жапаров депутат сифатида партиядошлари: “Ата-Журт” партияси етакчиси Қамчибек Ташиев ва депутат Талант Мамитов билан биргаликда “Қумтор” конига оид норозилик акциясига чиққан эди. Иш Олий судда кўриб чиқилиб, Ташиев, Жапаров ва Мамитов ҳокимиятни зўравонлик йўли билан эгаллаб олишга уриниш ва конституциявий тузумни ағдариб ташлашга очиқ чақиришда айбдор деб топилган. Жапаров бир йилу беш ой муддатга озодликдан маҳрум этилган. Кейинчалик Жапаров чет элга кетган, бир мунча вақт Кипр ва Россияда яшаган. 2013 йилда у депутатлик мандатини топширган.
2013 йилда Иссиқкўл вилоятининг Саруу қишлоғида “Қумтор” конини миллийлаштириш талаби билан митинг ўтказилган. Терговга кўра, митинг Садир Жапаров томонидан молиялаштирилган. Қирғизистон Миллий хавфсизлик давлат қўмитаси маълумотларига кўра, Жапаров телефон орқали намойишчиларга кўрсатма берган. Унга нисбатан Жиноят кодексининг тўрт моддаси бўйича иш қўзғатилган: “одам ўлдириш билан қўрқитиш”, “гаровга олиш”, “безорилик” ва “ҳокимият вакилига нисбатан зўравонлик қўллаш”.
2020 йил 5 октябрь куни Қирғизистонда парламент сайловлари натижаларига қарши оммавий норозилик намойишлари бошланган. Намойишчилар ва хавфсизлик кучлари ўртасидаги тўқнашувлардан сўнг парламентга кирмаган мухолиф партиялар тарафдорлари президент маъмурияти жойлашган парламент биносини эгаллаб олган. Тўқнашувларда 1,2 мингдан ортиқ киши жароҳатланган, бир киши ҳалок бўлган. 6 октябрга ўтар кечаси Садир Жапаров намойишчилар томонидан қамоқдан озод қилинган эди.
Шу йилнинг 20 октябрь куни Қирғизистон Олий суди Жапаровни 2012 йилда мамлакатда ҳокимиятни эгаллаб олишга уринганликдаги айбловини бекор қилган. Садир Жапаров Қирғизистон раҳбари лавозимига расман 2021 йил 28 январда киришган.
Изоҳ (0)