20 майга ўтар кечаси Қирғизистон Республикасининг собиқ президенти Асқар Акаев рафиқаси Майрам Акаева билан “Оқ Йўл” назорат-ўтказиш пунктидан ўтиб Қирғизистонга кириб келган. Бу ҳақда чегара хизматидаги манбаларга таяниб, “Кактус.медиа” хабар бермоқда.
Асқар Акаев 2021 йилда икки марта Қирғизистонга ташриф буюрганди. Биринчи марта у “Қумтор” иши бўйича тергов доирасида Миллий хавфсизлик давлат қўмитасига сўроққа чақирилган. Шундан сўнг у Москвага қайтиб кетган.
Бу сафар Акаевларнинг Қирғизистонга ташрифидан мақсад — улар Миллий фанлар академияси ва Политехника институтида маърузалар ўқиши режалаштирилган. Жуфтлик 2005 йилдан бери илк бор ватанига биргаликда ташриф буюрмоқда.
2023 йил январида Асқар Акаевга нисбатан “Қумтор” конини қазишдаги коррупция билан боғлиқ жиноий иш тўхтатилгани маълум бўлганди.
Сўнгги 10 йил ичида Майрам Акаева ўзи туғилган Талас вилоятига бир неча бор ташриф буюрган.
Маълумот учун, Асқар Акаев 1990 йил 27-октябрдан 1991 йил 31 августгача Қирғизистон ССР президенти, 1991 йил 31 августдан 2005 йил 11 апрелгача Қирғизистон республикаси президенти бўлган. У тўрт марта (1990, 1991, 1995, 2000) президентлик сайловларида ғалаба қозонган.
2005 йил 24 мартда полиция билан тўқнашув, президент қароргоҳининг ўраб олиниш ва талон-тарож қилиниши билан кечган халқ норозилиги натижасида Акаев махсус хизматлар ёрдамида мамлакатдан қочишга муваффақ бўлган.
Оммавий норозиликларга сайловлардаги сохталаштиришлар, шахсий манфаатни кўзлаб Конституцияга ноқонуний ўзгартириш киритишлар сабаб бўлган.
Ўшандан бери Акаевлар оиласи Москвада истиқомат қилади. Қирғизистоннинг собиқ президенти Москва университетларидан бирининг профессори ва у ерда дарс беради.
Коротовских Евгений, Қирғизистон
Изоҳ (0)