Қирғизистон 2,5 йил ичида “Қумтор” олтин конидан 300 миллион доллар дивиденд олди. Бу ҳақда Вазирлар маҳкамаси раиси Оқилбек Жапаровга таяниб, Sputnik хабар берди.
Жапаровнинг сўзларига кўра, 1994 йилдан 2021 йилнинг майигача мамлакат “Қумтор” фаолиятидан 100 миллион доллар дивиденд олган, 400 тонна олтин экспорт қилинган.
“Ўтган 2,5 йил давомида 300 миллион доллар дивиденд олдик, бу даврда солиқлар, жумладан, мажбурий тўловлар ҳисобига 710,8 миллион доллар келиб тушди”, — деди Вазирлар маҳкамаси раҳбари.
Қирғизистон президенти матбуот хизмати раҳбари Дайирбек Орунбеков 2023 йил декабрь ойида конда қанча олтин борлигини айтганди.
“Қумтор хорижий компания бошқарувида бўлган 28 йил давомида 410 тонна олтин қазиб олинди, аммо Қирғизистонга бир грамм ҳам ўтмади. Ўша йилларда Қирғизистон атиги 100 миллион доллар дивиденд олган. Қумтор давлатга ўтказилгандан кейин, аниқроғи, 2022–2023 йилларда республика 698,6 миллион доллар даромад олди. Бундан ташқари, омборларда 50 тоннадан ортиқ олтин бор”, — деган Орунбеков.
Изоҳ (0)