Қирғизистон собиқ президенти Сўронбой Жээнбеков Қумтор конини қазиш бўйича лойиҳадаги коррупция ҳолатлари юзасидан сўроқ қилинди. Қирғизистон Миллий хавфсизлик давлат қўмитаси (МХДҚ) маълум қилишича, Жээнбеков сўроққа гувоҳ сифатида чақирилган.
«Жээнбеков билан тергов ҳаракатлари давом этади. Олиб борилган тергов натижаларига кўра айбдор деб топилган жиноят иши иштирокчиларининг барчасига эгаллаб турган лавозими, хизматлари ва орден-нишонларидан қатъи назар, холисона юридик баҳо берилади», — дея маълум қилишди МХДҚдан.
Аввалроқ қўмита «Қумтор» лойиҳаси иши бўйича Идоралараро тергов гуруҳи 2017 йилда ушбу лойиҳа бўйича стратегик битим тузилиши билан боғлиқ воқеаларни тергов қилишнинг фаол босқичини бошлаган эди.
Собиқ президентнинг укаси, Жогорку Кенеш депутати Асилбек Жээнбеков аввалроқ «Қумтор» иши бўйича қўлга олинган бўлиб, айни пайтда МХДҚ изоляторида сақланмоқда.
Шунингдек, депутатлар ва собиқ бош вазирлар Муҳаммадкалий Абилгазиев ва Темир Сариев ҳам ҳибсга олинган. Собиқ ҳукумат раҳбари Омурбек Бабанов мамлакатни тарк этмаслик ҳақидаги тилхат билан қўйиб юборилган.
Қирғизистоннинг биринчи ва иккинчи президентлари Асқар Акаев ва Қурманбек Бакиевлар июль ойи бошларида «Қумтор» иши бўйича халқаро қидирувга берилганди. Асқар Акаев 2 август куни Қирғизистонга қайтди. Бишкекда у аввалига сўроққа тутилган, кейин президент Садир Жапаров уни шахсан қабул қилган.
Акаев ватанига қайтиб келиш имкониятини тақдим этгани учун Садир Жапаровдан миннатдор эканини билдирди ҳамда «Қумтор» иши бўйича терговга ёрдамлашишга тайёрлигини айтди.
Асқар Акаев йўл қўйган хатоликлари учун ҳамда «Қумтор» лойиҳасини амалга ошириш чоғида умидларни оқламагани учун қирғиз халқидан узр сўради. Қирғизистон собиқ президенти «Қумтор» иши бўйича Миллий хавфсизлик давлат қўмитасида сўроқ қилинганидан кейин мамлакатни яна тарк этди.
Кейинроқ Қирғизистон Миллий хавфсизлик давлат қўмитаси (МХДҚ) Бош прокуратура билан биргаликда «Қумтор» лойиҳаси бўйича келишувларни бекор қилиш жараёнини бошлади.
Изоҳ (0)