Тошкент шаҳрининг Юнусобод туманида мунтазам дарс қолдирган 60 нафар, тарбияси оғир 57 нафар мактаб ўқувчи устидан мутасаддиларга тақдимнома киритилди. Бу ҳақда пойтахт ИИББ ахборот хизмати хабар тарқатди.
Маълум бўлишича, пойтахт ИИББ томонидан президентнинг “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори ижросини таъминлаш мақсадида жиноятчилик таҳлиллари асосида идоралараро мувофиқлаштириш ҳудудий ишчи гуруҳи ташкил этилган.
Ёшлар бандлигини таъминлаш, интернет тармоқлари орқали берилаётган салбий, миллатимиз ва қадриятларимизга ёт ғоялардан, жиноий даъватлардан асраш, ҳимоя иммунитетини шакллантириш мақсадида 200 га яқин мактабларда “Давомат”, “Ўқувчи”, “Ўсмир” тадбирлари ўтказилди. Тадбирлар жараёнида дарс қолдираётган 38, мунтазам дарс қолдираётган 60 нафар, ота-она назоратидан маҳрум 16 нафар, боқувчисини йўқотган 17 нафар, тарбияси оғир ҳисобланган 57 нафар болалар аниқланиб, тегишли идора ва мутасаддиларга тақдимномалар киритилган, — дейилади шаҳар ИИББ тарқатган хабарда
Таъкидланишича, хотин-қизлар муаммоларини ўрганиш орқали 104 нафар аёлнинг мурожаатлари ижобий ҳал қилинган.
Саломатлигини тиклашга муҳтож бўлган 144 нафар аёлга тиббий муолажалар учун имтиёзли йўлланмалар ажратилган. 368 нафар ижтимоий кўмакка муҳтож хотин-қизлар рўйхати шакллантирилган. 107 нафар ишсизлар рўйхатида турувчи шахсларнинг 72 нафарига иш жойлари тавсия қилиниб, 33 нафари касб-ҳунарга йўналтирилди, — дейди масъуллар.
Қўшимча қилинишича, 20 нафар фуқаро Ташқи миграция агентлиги орқали хориж давлатларига ишга юборилган. Муқаддам судланган ва маъмурий назоратда турувчи 9 нафар фуқаронинг 5 нафари бандлиги таъминланган.
Маҳаллалар ҳудудида содир этилган йигирмага яқин жиноят ва ҳуқуқбузарликлар кенг жамоатчилик иштирокида муҳоқама қилиниб, жамоавий таъсир чоралари қўлланилди. Юқоридаги қарорнинг ижросини таъминлаш, жиноятчилик ва ҳуқуқбузарликларнинг барвақт олдини олиш мақсадида, ўғрилик жиноятлари содир этилган “қизил” ва “сариқ” тоифадаги кўчаларда жойлашган тўқсонга яқин савдо-маиший хизмат кўрсатиш объектлари “Қўриқлаш” хизматига уланган бўлса, бозорлар, савдо мажмуалари ҳудудларида ўндан ортиқ кузатув ва назорат камералари ўрнатилди. “Қўриқлаш” хизмати томонидан мингдан ортиқ объектлар хатлов қилинди ҳамда “Ҳудуд камера назоратида”, “Объект қўриқловда” “Хонадон қўриқловда” каби 350 га яқин стикерлар ёпиштирилди, — дейилади бу ҳақдаги хабарда.
Изоҳ (0)