Қашқадарёнинг Чироқчи туманидаги мактабда ўқувчи ва ўқитувчи ўртасида келишмовчилик юзага келгани акс этган видео ижтимоий тармоқларда тарқалди. Расмийлар ҳолатни ўрганиб, тегишли жазо тайинланганини маълум қилди.
Болалар омбудсманининг билдиришича, 8 февраль куни 8-синф ўқувчилари Б.Н. ва Э.С. инглиз тили фани дарси вақтида ўзаро тортишиб турли сўзлар билан бир-бирини ҳақорат қилган. Ўқитувчи Э.Ф. ўқувчига дарсдан чиқиб кетишини айтган, бироқ ўқувчи ўқитувчининг талабига бўйсунмасдан унга нисбатан ноўрин сўзлар ишлатган.
Мазкур ҳолат юзасидан хизмат текшируви тайинланиб, тегишли тартибда ўрганиш олиб борилди ҳамда педагог ходимларга нисбатан интизомий жазо чораси қўлланди.
Мактаб тартиб-қоидаларини бузган ўқувчиларнинг ота-оналарига нисбатан Маъмурий жавобгарлик тўғрисидаги кодекснинг 47-моддасига (болаларни тарбиялаш ва уларга таълим бериш борасидаги мажбуриятларни бажармаслик) кўра маъмурий баённома расмийлаштирилди. Ушбу моддада БҲМнинг 1 бараваридан 5 бараваригача (375 минг сўмдан 1 миллион 875 минг сўмгача) миқдорда жарима белгиланган.
Қашқадарё вилояти Мактабгача ва мактаб таълими бошқармаси ҳам Чироқчи туманидаги 34-умумий ўрта таълим мактабида юз берган ҳолат юзасидан муносабат билдирди.
“Кейинги йилларда мамлакатимизда таълим ташкилотларининг педагог ходимларининг ўз хизмат вазифаларига аралашиш ҳамда уларни обросизлантириш ҳолатларига қарши курашиш ишлари амалга оширилмоқда. Шунингдек, фарзанд тарбиясида ота-оналарнинг ҳам етарли мажбуриятлари борлигини ва салбий ҳолатларни келтириб чиқарганлик учун қонунчиликда жазо чораси борлигини маълум қиламиз”, дейилади муносабатда.
Аввалроқ Сирдарё вилоятидаги мактабда аёл дарс вақтида синфга бостириб кириб, ўқитувчини урганди. Ҳолат бўйича маъмурий иш қўзғатилиб, Жиноят ишлари бўйича Сирдарё туман судида кўриб чиқилди ва аёл руҳий касалликлар шифохонасига жойлаштирилди. Аёлнинг ўзи қилмиши учун узр сўраб чиқди.
Шундан сўнг мактабгача ва мактаб таълими вазири Ҳилола Умарова муносабат билан чиқиб, каби зўравонлик ҳолатлари юз берганда ўқитувчи-педагогларни ҳимоя қилиш учун керакли юридик, ижтимоий, психологик ёрдам берилишини билдирди.
“Шуни тушуниб олишимиз керакки, мактабга дуч келган одам (дарс вақтида ҳатто ота-она ҳам) истаганича кириб-чиқиш, дарс жараёни ва педагоглар фаолиятига аралашиш, ўқитувчига дўқ қилиш уёқда турсин, маданият чегарасидан четга чиқиб гаплашишга ҳақли эмас”, деди вазир.
Ҳилола Умарова ўқитувчилар, педагоглар қадр-қимматингизни ҳимоя қилиш учун барча имкониятларни ишга солишга тайёрлигини таъкидлади.
“Педагогнинг мақоми тўғрисида”ги қонуннинг 3-моддасида педагогнинг ҳуқуқлари, шаъни, қадр-қиммати ва ишчанлик обрўси давлат ҳимояси остида бўлиши белгилаб қўйилган.
Мактабда ўқитувчиларнинг калтакланиши
2024 йилнинг октябрида Сирдарё туманидаги 2-мактабда икки ўқувчи қиз ўқитувчини урганди. Ўша йилнинг апрелида Фарғонада мактаб ўқитувчиси ўқувчининг қариндошлари томонидан калтакланганди. 2023 йилнинг майида Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди.
Изоҳ (0)