Ижтимоий тармоқларда номаълум шахс томонидан Тошкентдаги 71-мактаб ўқувчилари хавфсизлигига таҳдид қилинган хабарлар тарқалди. Мактабгача ва мактаб таълими бошқармаси ҳолат юзасидан изоҳ берди.
Қайд этилишича, Мирзо Улуғбек туманидаги 71-сонли умумтаълим мактабида таълим жараёнлари бошқарма томонидан тўлиқ назоратга олинган. Бугун мактабнинг биринчи ва иккинчи навбатидаги дарслар белгиланган жадвал асосида ўтказилди.
Юқоридаги аноним ёзилган хабар ўз исботини топмади. Мактаб маъмурияти, миллий гвардия, психолог-инспектор ота-оналар ва ўқувчилар билан тушунтириш ишларини амалга ошириб, бу каби асоссиз хабарларга ишонмасликка ҳамда доимо ҳушёр бўлишга чақирган.
Мактабдаги жанжаллар
Аввалроқ Сирдарёда ўқитувчи 1-синф ўқувчисини қўлига игна санчиш билан жазолангани ҳақида хабарлар тарқалганди. Суриштирув давомида юқоридаги ҳолат тасдиғини топмаган.
Қашқадарёнинг Шаҳрисабз туманидаги мактабда ўқитувчи 5-синф ўқувчисини уриб жароҳатлади. Қарши шаҳридаги мактабда ўқитувчи ва ўқувчи ёқалашгани тасвирлари тарқалди. Алгебра фани ўқитувчиси ва 10-синф ўқувчиси бўлган икки қиз ўртасида ўзаро келишмовчилик келиб чиқиб, оғзаки тортишиб қолган. Уларнинг хатти-ҳаракатларига чора кўриш учун судга берилган.
Тошкентдаги мактабда аёл дастлабки иш кунида ўқувчини калтаклагани ҳам кенг муҳокамаларга сабаб бўлганди. Аёл жазоланиб, мактаб директори ишдан олинганди.
Ўқитувчига тазйиқ ўтказиш ҳолатлари
2024 йилнинг октябрида Сирдарё туманидаги 2-мактабда икки ўқувчи қиз ўқитувчини урганди. Ўша йилнинг апрелида Фарғонада мактаб ўқитувчиси ўқувчининг қариндошлари томонидан калтакланганди. 2023 йилнинг майида Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди. Сентябрь ойида Сурхондарёда мактаб директори ўқитувчининг яқин қариндошлари томонидан калтакланганди. Мазкур ҳолатлар юзасидан ҳуқуқбузарларга қилмишидан келиб чиққан ҳолда жазо чоралари кўрилган.
Қонунчиликка кўра, жамоат тартибига ёки хавфсизлигига таҳдид солувчи ёлғон ахборотни тарқатган шахс БҲМнинг 100 бараваригача (37 млн 500 минг сўмгача) жаримага тортилиши мумкин.
Шунингдек, ёлғон ахборот тарқатганлик учун маъмурий жавобгарликка тортилган шахс ушбу ҳуқуқбузарликка такроран йўл қўйса, қуйидаги жазо чораларидан бири қўлланилиши мумкин:
- БҲМнинг 200 бараваригача (75 млн сўмгача) миқдорда жарима;
- 300 соатгача мажбурий жамоат ишлари;
- 2 йилгача ахлоқ тузатиш ишлари;
- 2 йилгача озодликни чеклаш.
Изоҳ (0)