Тармоқларда Қашқадарё вилоятининг Чироқчи туманида ўқувчининг ўқитувчисига қўл кўтаргани акс этган видео тарқалганди. Болалар омбудсмани ҳолатни ўрганиб, ўқитувчи ва ўқувчининг ота-онасига чора кўрилганини маълум қилди. Қашқадарё вилояти мактабгача ва мактаб таълими бошқармаси бошлиғи Убайдулла Орипов ўқитувчига чора кўрилганини рад этди.
Бу ҳақда “Дарё”га хабар берган Убайдулла Орипов воқеадан сўнг ўқитувчига чора кўрилгани билан боғлиқ ахборот хато эканини, аммо ўқувчининг ота-онасига жарима қўлланганини тасдиқлади.
Улар ўзаро келишиб, ярашиб олишди. Бундан кейин ҳолат такрорланмаслиги учун тушунтириш ишлари олиб борилди, дейди масъул.
Болалар омбудсмани ахборот хизмати масъули Дилноза Юсупова уларга ўқитувчига ҳам чора кўрилгани ҳақида ахборот берилганини, бироқ ўзлари буни ҳозирча аниқлаштиришга улгурмаганини билдирди.
Аниқлаштириб, бу ҳақда сизга маълум қиламиз, деб ёзади Дилноза Юсупова “Дарё” журналистининг бу ҳақдаги саволига жавоб берар экан.
Маълум қилинишича, 8 февраль куни 8-синф ўқувчилари Б.Н. ва Э.С. инглиз тили фани дарси вақтида ўзаро тортишиб турли сўзлар билан бир-бирини ҳақорат қилган. Ўқитувчи Э.Ф. ўқувчига дарсдан чиқиб кетишини айтган, бироқ ўқувчи ўқитувчининг талабига бўйсунмасдан унга нисбатан ноўрин сўзлар ишлатган.
Мактаб тартиб-қоидаларини бузган ўқувчиларнинг ота-оналарига нисбатан Маъмурий жавобгарлик тўғрисидаги кодекснинг 47-моддасига (болаларни тарбиялаш ва уларга таълим бериш борасидаги мажбуриятларни бажармаслик) кўра маъмурий баённома расмийлаштирилди. Ушбу моддада БҲМнинг 1 бараваридан 5 бараваригача (375 минг сўмдан 1 миллион 875 минг сўмгача) миқдорда жарима белгиланган.
Аввалроқ Сирдарё вилоятидаги мактабда аёл дарс вақтида синфга бостириб кириб, ўқитувчини урганди. Ҳолат бўйича маъмурий иш қўзғатилиб, Жиноят ишлари бўйича Сирдарё туман судида кўриб чиқилди ва аёл руҳий касалликлар шифохонасига жойлаштирилди. Аёлнинг ўзи қилмиши учун узр сўраб чиқди.
Шундан сўнг мактабгача ва мактаб таълими вазири Ҳилола Умарова муносабат билан чиқиб, каби зўравонлик ҳолатлари юз берганда ўқитувчи-педагогларни ҳимоя қилиш учун керакли юридик, ижтимоий, психологик ёрдам берилишини билдирди.
“Шуни тушуниб олишимиз керакки, мактабга дуч келган одам (дарс вақтида ҳатто ота-она ҳам) истаганича кириб-чиқиш, дарс жараёни ва педагоглар фаолиятига аралашиш, ўқитувчига дўқ қилиш уёқда турсин, маданият чегарасидан четга чиқиб гаплашишга ҳақли эмас”, деди вазир.
Ҳилола Умарова ўқитувчилар, педагоглар қадр-қимматингизни ҳимоя қилиш учун барча имкониятларни ишга солишга тайёрлигини таъкидлади.
“Педагогнинг мақоми тўғрисида”ги қонуннинг 3-моддасида педагогнинг ҳуқуқлари, шаъни, қадр-қиммати ва ишчанлик обрўси давлат ҳимояси остида бўлиши белгилаб қўйилган.
Мактабда ўқитувчиларнинг калтакланиши
2024 йилнинг октябрида Сирдарё туманидаги 2-мактабда икки ўқувчи қиз ўқитувчини урганди. Ўша йилнинг апрелида Фарғонада мактаб ўқитувчиси ўқувчининг қариндошлари томонидан калтакланганди. 2023 йилнинг майида Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди.
Изоҳ (0)