Тошкент шаҳар Сергели туманида BYD 9 ёшли мактаб ўқувчисини уриб юборди. Бу ҳақда ИИББ хабар берди.
Келтирилишича, ҳолат 19 сентябрь куни соат тахминан 13:45 ларда Сергели тумани, Файзли Тошкент кўчасида содир бўлган. 1983 йилда туғилган М.А. BYD русумли, давлат рақам белгиси 01 444 VFA бўлган автомашинада ҳаракатланиб, пиёдани уриб юборган.
Йўл-транспорт ҳодисаси натижасида вояга етмаган 2015 йилда туғилган Л.С. олган тан жароҳатлари сабабли касалхонага олиб борилган вақтда вафот этган.
Мазкур ҳолат юзасидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ҳозирда тергов ҳаракатлари олиб борилмоқда.
Худди шу каби ҳолат 1 июль куни Навоий вилояти Хатирчи туманида содир бўлган. 140 км/соат тезликда ҳаракатланаётган BYD русумидаги автомобиль, тартибга солинмаган пиёдалар ўтиш жойидан ўтаётган 9 ёшли қизалоқни босиб кетиб, унинг бевақт ўлимига сабаб бўлганди.
Бундан ташқари, 3 июль куни Самарқанд туманида Nexia-2 русумли автомобиль йўлнинг белгиланмаган қисмидан югуриб ўтаётган 7 ёшли болани уриб юборган. Ушбу ҳодиса оқибатида эса 2017 йилда туғилган бола кўрсатилган тиббий муолажаларга қарамасдан шифохонада бевақт ҳаётдан кўз юмган.
5 ойда 65 нафар мактаб ўқувчиси…
Олий Мажлис Сенатининг Мудофаа ва хавфсизлик масалалари қўмитасининг тақдим этган маълумотларига кўра, 2024 йилнинг беш ойида содир бўлган йўл-транспорт ҳодисаларининг 53,7 фоизи пиёда ва велосипедчилар билан боғлиқ ҳолатлар ҳиссасига тўғри келган.
Бундан ташқари, умумий ўрта таълим мактабларининг 9 548 таси транспорт қатнови кўп ҳудудларда жойлашган ва аксарият мактаблар олдида пиёдалар учун йўлаклар мавжуд эмас, тегишли светофорлар ўрнатилмаган. Бунинг оқибатида 2024 йилнинг 5 ойи давомида жами 359 нафар ўқувчи билан боғлиқ йўл-транспорт ҳодисаси содир этилган ва 65 нафар ўқувчи ҳалок бўлган, 294 нафар ўқувчи эса турли даражада тан жароҳатлари олган.
Қўмита маълумотларига кўра, 2023 йилда болалар билан боғлиқ 1 794 та йўл-транспорт ҳодисаси содир этилиб, уларда 1 568 нафар бола жароҳатланган ва 263 нафар бола ҳаётдан эрта кўз юмган.
Изоҳ (0)