Ижтимоий тармоқ саҳифаларида Тошкент шаҳридаги 240-мактаб ўқитувчиси ўқувчини дўппослагани акс этган видео тарқалганди. Ҳолат юзасидан Мактабгача ва мактаб таълими бошқармаси маълумот берди.
Унга кўра, ҳолат бошқарма ишчи гуруҳи томонидан ўрганилди. Юнусобод туманидаги 240-сонли умумтаълим мактабида шу йилнинг 15 январь куни тахминан соат 16 лар атрофида 5-“Г” синф ўқувчиси М.С. бошланғич таълим фани ўқитувчиси Н.Қ.нинг дарс машғулотига халақит қилиб, синфхона эшигини бир неча марта тепган ва тақиллатган.
Оқибатда ўқитувчи Н.Қ. ўқувчига танбеҳ бериб, М.С.ни синф раҳбари олдига олиб борган ва бошига бир маротаба ургани маълум бўлди. Аммо видеомурожаатда акс этган лавҳа 240-мактабга тегишли эмаслиги аниқланган.
Ўқувчининг онаси О.Д. ўқитувчининг хатти-ҳаракатидан норози бўлиб ҳуқуқ-тартибот идораларига шикоят хати билан мурожаат қилган. 2025 йил 13 февраль куни бўлиб ўтган Тошкент шаҳар жиноят ишлари бўйича Юнусобод туман суди қарорига кўра, ўқитувчига нисбатан Маъмурий жавобгарлик тўғрисидаги кодекснинг 33-моддаси қўлланиб, жарима жазоси белгиланган.
Мактабдаги жанжаллар
Аввалроқ Сирдарёда ўқитувчи 1-синф ўқувчисини қўлига игна санчиш билан жазолагани ҳақида хабарлар тарқалганди. Суриштирув давомида юқоридаги ҳолат тасдиғини топмаган.
Қашқадарёнинг Шаҳрисабз туманидаги мактабда ўқитувчи 5-синф ўқувчисини уриб жароҳатлади. Қарши шаҳридаги мактабда ўқитувчи ва ўқувчи ёқалашгани тасвирлари тарқалди. Алгебра фани ўқитувчиси ва 10-синф ўқувчиси бўлган икки қиз ўртасида ўзаро келишмовчилик келиб чиқиб, оғзаки тортишиб қолган. Уларнинг хатти-ҳаракатларига чора кўриш учун судга берилган.
Тошкентдаги мактабда аёл дастлабки иш кунида ўқувчини калтаклагани ҳам кенг муҳокамаларга сабаб бўлганди. Аёл жазоланиб, мактаб директори ишдан олинганди.
Ўқитувчига тазйиқ ўтказиш ҳолатлари
2024 йилнинг октябрида Сирдарё туманидаги 2-мактабда икки ўқувчи қиз ўқитувчини урганди. Ўша йилнинг апрелида Фарғонада мактаб ўқитувчиси ўқувчининг қариндошлари томонидан калтакланганди. 2023 йилнинг майида Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди. Сентябрь ойида Сурхондарёда мактаб директори ўқитувчининг яқин қариндошлари томонидан калтакланганди. Мазкур ҳолатлар юзасидан ҳуқуқбузарларга қилмишидан келиб чиққан ҳолда жазо чоралари кўрилган.
Изоҳ (0)