Toshkent shahrining Yunusobod tumanida muntazam dars qoldirgan 60 nafar, tarbiyasi og‘ir 57 nafar maktab o‘quvchi ustidan mutasaddilarga taqdimnoma kiritildi. Bu haqda poytaxt IIBB axborot xizmati xabar tarqatdi.
Maʼlum bo‘lishicha, poytaxt IIBB tomonidan prezidentning “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida”gi qarori ijrosini taʼminlash maqsadida jinoyatchilik tahlillari asosida idoralararo muvofiqlashtirish hududiy ishchi guruhi tashkil etilgan.
Yoshlar bandligini taʼminlash, internet tarmoqlari orqali berilayotgan salbiy, millatimiz va qadriyatlarimizga yot g‘oyalardan, jinoiy daʼvatlardan asrash, himoya immunitetini shakllantirish maqsadida 200 ga yaqin maktablarda “Davomat”, “O‘quvchi”, “O‘smir” tadbirlari o‘tkazildi. Tadbirlar jarayonida dars qoldirayotgan 38, muntazam dars qoldirayotgan 60 nafar, ota-ona nazoratidan mahrum 16 nafar, boquvchisini yo‘qotgan 17 nafar, tarbiyasi og‘ir hisoblangan 57 nafar bolalar aniqlanib, tegishli idora va mutasaddilarga taqdimnomalar kiritilgan, — deyiladi shahar IIBB tarqatgan xabarda
Taʼkidlanishicha, xotin-qizlar muammolarini o‘rganish orqali 104 nafar ayolning murojaatlari ijobiy hal qilingan.
Salomatligini tiklashga muhtoj bo‘lgan 144 nafar ayolga tibbiy muolajalar uchun imtiyozli yo‘llanmalar ajratilgan. 368 nafar ijtimoiy ko‘makka muhtoj xotin-qizlar ro‘yxati shakllantirilgan. 107 nafar ishsizlar ro‘yxatida turuvchi shaxslarning 72 nafariga ish joylari tavsiya qilinib, 33 nafari kasb-hunarga yo‘naltirildi, — deydi masʼullar.
Qo‘shimcha qilinishicha, 20 nafar fuqaro Tashqi migratsiya agentligi orqali xorij davlatlariga ishga yuborilgan. Muqaddam sudlangan va maʼmuriy nazoratda turuvchi 9 nafar fuqaroning 5 nafari bandligi taʼminlangan.
Mahallalar hududida sodir etilgan yigirmaga yaqin jinoyat va huquqbuzarliklar keng jamoatchilik ishtirokida muhoqama qilinib, jamoaviy taʼsir choralari qo‘llanildi. Yuqoridagi qarorning ijrosini taʼminlash, jinoyatchilik va huquqbuzarliklarning barvaqt oldini olish maqsadida, o‘g‘rilik jinoyatlari sodir etilgan “qizil” va “sariq” toifadagi ko‘chalarda joylashgan to‘qsonga yaqin savdo-maishiy xizmat ko‘rsatish obyektlari “Qo‘riqlash” xizmatiga ulangan bo‘lsa, bozorlar, savdo majmualari hududlarida o‘ndan ortiq kuzatuv va nazorat kameralari o‘rnatildi. “Qo‘riqlash” xizmati tomonidan mingdan ortiq obyektlar xatlov qilindi hamda “Hudud kamera nazoratida”, “Obyekt qo‘riqlovda” “Xonadon qo‘riqlovda” kabi 350 ga yaqin stikerlar yopishtirildi, — deyiladi bu haqdagi xabarda.
Izoh (0)