Тошкентдаги мактабда ўқувчи йигит бир неча тенгдошлари томонидан калтаклангани ҳақида хабар берилган эди. Тошкент шаҳар мактабгача ва мактаб таълими бошқармаси ҳолат юзасидан маълумот берди.
Унга кўра, ҳолат 22 май куни соат 12:15 ларда Юнусобод туманидаги умумтаълим мактабларидан бирининг ҳовлисида содир бўлган. Унда мактабнинг 11-“Б” ҳамда 11-“Д” синфининг 6 нафар ўқувчиси ўзаро тортишиб қолишган ва муштлашган.
Ҳодисадан хабар топган мактаб маъмурияти шу заҳоти уларни ажратиб қўйган. Муштлашув натижасида ўқувчилардан Р.О., И.И., Й.Б., А.Б. енгил тан жароҳати олган ва уларга мактаб тиббий бўлим ходимлари томонидан биринчи ёрдам кўрсатилган. Жанжал иштирокчилари ўзларини яхши ҳис қилган, ҳеч ким беҳуш бўлиб қолмаган.
Зудлик билан Юнусобод тумани ИИБ психолог-инспектори воқеадан хабардор қилинган, ички ишлар ходими соат 12:17 да мактабга етиб келган ва баённома расмийлаштирилган. Ўқувчиларнинг ота-оналари мактабга чақиртирилиб, фарзандлари иштирокида профилактик тушунтириш ишлари олиб борилган. Сўнгра ота-оналар ўз фарзандларини уйларига олиб кетган.
Юқоридаги ҳолат тўлиқ Тошкент шаҳар мактабгача ва мактаб таълими бошқармаси назоратига олинган. Айни пайтда мазкур ҳолат юзасидан Юнусобод тумани ИИО ФМБ тергов бўлими томонидан Жиноят кодексининг 277-моддаси билан жиноят иши қўзғатилган.
Ўқувчилар ўртасида муштлашувлар
2022 йилнинг октябрида ижтимоий тармоқларда Наманганнинг Косонсой туманида мактаб ўқувчилари муштлашуви акс этган тасвирлар тарқалганди. Ноябрда эса Тошкентда ўқувчилар футболдаги жанжал сабаб муштлашиб кетган эди. Кейинроқ пойтахт ИИББ воқеага муносабат билдириб, мазкур ҳолат юзасидан Янгиҳаёт тумани ИИО ФМБ томонидан текширув ўтказилаётганини маълум қилган.
Шунингдек, Тошкентда мактаб ўқувчилари “Америка киносига тақлид қилиб” муштлашув уюштиргани, Хоразм вилояти Урганч туманида жойлашган икки мактаб ўқувчиси ўртасида жанжал содир бўлгани тўғрисида хабар берилганди.
Изоҳ (0)