Тошкент шаҳар Яшнобод туманидаги мактабларнинг бирида 9- ва 7-синф ўқувчилари ўртасида жанжал содир бўлди. Бу ҳақда Мактабгача ва мактаб таълими вазирлиги ахборот хизмати хабар берди.
Унга кўра, ҳолат 24 май куни 161-мактабда дарсдан кейин, тахминан соат 13:00 ларда содир бўлган. 9-синф ўқувчиси Т.А. 7-синфнинг уч нафар ўқувчиси билан тортишиб қолган ва жанжаллашган. Ўша маҳалда 9-синф ўқувчилари Сўнгги қўнғироқ тадбири бадиий дастури учун тайёргарлик кўришаётган бўлган. Ўқувчи Т.А. машғулотимизга халақит қилдинглар, деб 7-синф ўқувчиларини ҳақорат қилган.
Натижада уч нафар ўқувчи Т.А. билан муштлашиб қолган. Воқеадан хабар топган мактаб маъмурияти, синф раҳбарлари шу заҳотиёқ жанжални тўхтатиб, ўқувчиларни ўзаро яраштириб қўйган. Ҳеч ким жароҳатланмаган. Шундан сўнг, 9-синф ўқувчилари репетицияни давом эттирган ва машғулотни тугатиб, уйларига тарқалган.
Қайд этилишича, жанжалда иштирок этган ўқувчилар ва уларнинг ота-оналари чақиртирилиб, улар билан профилактик тушунтириш ишлари олиб борилган. Ҳозирда юқоридаги ҳолат юзасидан Яшнобод туман ИИО ФМБ томонидан суриштирув ишлари олиб борилмоқда.
Ўқувчилар ўртасида муштлашувлар
2022 йилнинг октябрида ижтимоий тармоқларда Наманганнинг Косонсой туманида мактаб ўқувчилари муштлашуви акс этган тасвирлар тарқалганди. Ноябрда эса Тошкентда ўқувчилар футболдаги жанжал сабаб муштлашиб кетган эди. Кейинроқ пойтахт ИИББ воқеага муносабат билдириб, мазкур ҳолат юзасидан Янгиҳаёт тумани ИИО ФМБ томонидан текширув ўтказилаётганини маълум қилган.
Шунингдек, Тошкентда мактаб ўқувчилари “Америка киносига тақлид қилиб” муштлашув уюштиргани, Хоразм вилояти Урганч туманида жойлашган икки мактаб ўқувчиси ўртасида жанжал содир бўлгани тўғрисида хабар берилганди.
Изоҳ (0)