Шавкат Мирзиёев 5 март куни коррупциянинг олдини олиш бўйича ишлар натижадорлиги ва келгусидаги устувор вазифаларга бағишланган кенгайтирилган йиғилишда болани мактаб ёки боғчага жойлаштириш, ОТМга киришдаги таниш-билишликлар ҳақида гапирди.
“Одамлар боласини мактаб ёки боғчага жойлаштиришда сарсон бўлган, ишини бошқа йўллар билан ҳал қилишга тўғри келган эди. Ўтган даврда мактабгача ва мактаб таълими тизимида 10 дан ортиқ хизмат турлари тўлиқ электрон шаклга ўтказилди. Ушбу соҳада мурожаатлар сони 2,5 каррага камайди”, деди президент.
Давлат раҳбари бундан 7-8 йил аввал олийгоҳларга ўқишга киришда таниш-билишчилик авж олганини эслатиб ўтиб, эндиликда соҳа рақамлашгани, имтиҳонлар онлайн трансляция бўлаётганини таъкидлади. Шунингдек, аввал тест топшириб, тўплаган баллига қараб, кейин олийгоҳни танлаш тизими жорий қилинганини айтиб ўтди.
“Олий таълимда 35 турдаги ҳужжатларни инсон омилисиз олишга ўтилгани учун соҳадаги мурожаатлар 2,2 баравар камайди”, деди президент.
Шавкат Мирзиёев илгари одамлар кредит олиш учун кўплаб тўсиқ ва ғовларни енгиб ўтиши керак бўлганига ҳам тўхталиб ўтди.
“Бугунга келиб барча банклар 100 миллион сўмгача маиший кредитларни инсон омилисиз 5 дақиқа ичида онлайн бермоқда. Натижада олдин бу иш билан шуғулланган минглаб банкирлар энди маҳаллага тушиб, одамларга лойиҳа, кредит таклиф қилиб, мижозини кўпайтириш устида ишлаяпти”, деди давлат раҳбари.
Йиғилишда таъкидланишича, давлат харидлари бўйича қонун қабул қилингани, танлов ва тендер рақамлашиб, соғлом рақобат бўлгани учун ўтган йили 14 триллион сўм бюджет маблағи тежалди.
Изоҳ (0)