Жиноят ишлари бўйича Олмалиқ шаҳар судида май ойида икки нафар ўқувчи қизни уриб юборган Damas ҳайдовчисига ҳукм ўқилди. Бу ҳақда “Олмалиқ ишчиси” газетаси хабар берди.
15 май куни 2004 йилда туғилган ҳайдовчи С.Х. бошқарувидаги Damas автомашинасида шаҳарнинг 21-мактаб қаршисидаги пиёдалар йўлакчасидан ўтаётган 14 ёшли икки нафар ўқувчи қизни уриб юбориб, йўл-транспорт ҳодисаси содир этганди.
Тошкент вилояти ИИББ матбуот хизматининг хабар қилишича, 24 май куни машина уриб юборган қизлардан бири — 2009 йилда туғилган М.Й. олиб борилган тиббий муолажаларга қарамай, шифохонада вафот этган.
“Суд-автотехника экспертизаси хулосасига кўра, Damas автомобили ҳайдовчиси Йўл ҳаракати қоидаларига, хусусан, светофор, йўл белгилари ва чизиқлари сигналларига риоя қилганида, йўл-транспорт ҳодисасининг олдини олиш учун техник имкониятга эга бўлган”, — деб ёзади газета.
Судда судланувчи ўз айбига тўлиқ иқрор бўлган. Унинг айби жабрланувчи, қонуний вакиллари кўрсатмалари, ўз айбига иқрор бўлишлари, видеоматериаллар, суд-тиббиёт ва суд автотехника экспертизаларининг хулосалари билан тасдиқланган.
Суд ҳукмига кўра, айбланувчи Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисмида назарда тутилган жиноятни содир этганликда айбдор деб топилди. Унга нисбатан 2 йил муддатга транспорт воситаларини бошқариш ҳуқуқини чеклаган ҳолда 6 йил муддатга манзил-колонияда озодликдан маҳрум қилиш жазоси тайинланди.
Изоҳ (0)