Тошкент шаҳар Юнусобод туманида жойлашган мактабларнинг бирида ўқувчи йигит бир неча тенгдошлари томонидан калтакланди.
Маълум қилинишича, ҳолат 22 май куни соат тахминан 12:30 ларда Юнусобод туманидаги мактабларнинг бирида содир бўлган. Калтакланган ўқувчи кўз ва қош қисмидан жароҳатланган.
“Йиғилиб турадиган жойимизда гап тарқалган, мени уришмоқчи бўлишган. 11-синф бола мени чақириб ёқмаётганимни айтди. Нима қилишим керак, дедим. Кейин мени уриб йиқитишди. Ҳамма устимда туриб тепди, беш дақиқа ҳушимга кела олмадим. Мени 10 тача одам урди. Айни пайтда аҳволим яхши эмас, ҳар куни бошим оғрияпти, телевизор, телефон кўриш мумкин эмас”, — дейди жабрланувчи йигит.
Жабрланувчининг онаси ҳам воқеа ҳақида айтиб, ҳозир фарзанди кўзини очиб юришга қийналаётганини таъкидлади.
“Телефон қилиб, ўғлингизнинг аҳволи оғир, тез келинг дейишди. Борсам боламни калтаклашган экан. Врачга олиб бориб, текширтиришим кераклигини айтишди. Шифохонага олиб борсам аҳволи ёмон эканлигини, сатрисения бўлганини, орбита қисмлари синган, дейишди. Жароҳатини бош ёпиқ жароҳати, деб беришган. Кўзини кўп очиб юра олмаяпти. Қонуний чора кўришни илтимос қиламан. Директордан камерадаги ёзувларни сўрасам, камера ишламаслигини айтди”, — дейди унинг онаси.
Мазкур ҳолат юзасидан туман ИИО бошқармаси тергов бўлими томонидан Жиноят кодексининг 277-моддаси билан жиноят иши қўзғатилди.
Ўқувчилар ўртасида муштлашувлар
2022 йилнинг октябрида ижтимоий тармоқларда Наманганнинг Косонсой туманида мактаб ўқувчилари муштлашуви акс этган тасвирлар тарқалганди. Ноябрда эса Тошкентда ўқувчилар футболдаги жанжал сабаб муштлашиб кетган эди. Кейинроқ пойтахт ИИББ воқеага муносабат билдириб, мазкур ҳолат юзасидан Янгиҳаёт тумани ИИО ФМБ томонидан текширув ўтказилаётганини маълум қилган.
Шунингдек, Тошкентда мактаб ўқувчилари “Америка киносига тақлид қилиб” муштлашув уюштиргани, Хоразм вилояти Урганч туманида жойлашган икки мактаб ўқувчиси ўртасида жанжал содир бўлгани тўғрисида хабар берилганди.
Изоҳ (0)