Ижтимоий тармоқларда Оққўрғон туманида мактаб ўқувчиси информатика ўқитувчиси томонидан аёвсиз калтакланган видеолавҳалар тарқалди. Ҳолат юзасидан Болалар омбудсмани маълумот берди.
Фото: Ижтимоий тармоқлар
Аниқланишича, ҳодиса 9 октябрь куни Оққўрғон туманида жойлашган 6-умумтаълим мактабида содир бўлган.
Информатика фани ўқитувчиси М.А (1990 йилда туғилган эркак) мазкур фандан қўшимча дарс ўтаётган вақтида 9-синф ўқувчиси вояга етмаган Қ.С.ни (2009 йилда туғилган ўғил бола) дарс жараёнида ўқитувчини гўёки чалғитганлиги туфайли ҳақорат қилиб, дўппослади.
Ҳозирда ушбу ҳолат юзасидан Оққўрғон туман ИИБ томонидан терговга қадар текширув ҳаракатлари олиб борилмоқда.
Вояга етмаган Қ.С.га нисбатан жароҳат даражасини аниқлаш бўйича судга оид тиббий экспертиза тайинланган.
Ўқувчилар ўртасида муштлашувлар
2022 йилнинг октябрида ижтимоий тармоқларда Наманганнинг Косонсой туманида мактаб ўқувчилари муштлашуви акс этган тасвирлар тарқалганди. Ноябрда эса Тошкентда ўқувчилар футболдаги жанжал сабаб муштлашиб кетган эди. Кейинроқ пойтахт ИИББ воқеага муносабат билдириб, мазкур ҳолат юзасидан Янгиҳаёт тумани ИИО ФМБ томонидан текширув ўтказилаётганини маълум қилган.
Шунингдек, Тошкентда мактаб ўқувчилари “Америка киносига тақлид қилиб” муштлашув уюштиргани, Хоразм вилояти Урганч туманида жойлашган икки мактаб ўқувчиси ўртасида жанжал содир бўлгани тўғрисида хабар берилганди.
2023 йилнинг июнь ойида Тошкент шаҳар Юнусобод туманида жойлашган мактабларнинг бирида ўқувчи йигит бир неча тенгдошлари томонидан калтакланганди.
Изоҳ (0)