Ижтимоий тармоқларда Фарғонадаги мактабларнинг бирида ўқитувчи аёл дарс вақтида ўқувчилардан бирини калтаклагани акс этган видео тарқалди. “Миллар” дастурида ҳолат юзасидан маълумот берилди.
Қайд этилишича, ҳолат ижтимоий тармоқларда айтилган Марғилон шаҳридаги 2-мактабда эмас, балки 11-мактабда 2024 йили декабрь ойида содир бўлган. Мактабнинг 8-“А” синф раҳбари С.Д. ўқувчиси Т.М.ни мунтазам дарсларга кирмай юргани, кўп шўхлик қилгани ва ўқитувчиларнинг шикоятлари сабабли койиб, танбеҳ берган ва тартибга чақирган.
Ўқувчига устозининг сўзлари ёқмаган ва унга нисбатан ҳурматсизлик қилиб, қўпол сўзлар билан гап қайтарган. Ўқитувчи эса ўзини тутолмай, асабий ҳолатда ўқувчига қўл кўтарган.
Ушбу воқеа мактаб жамоасида муҳокама қилинган. Муаллима ўзининг хатти-ҳаракатидан афсусдалигини, бундай ҳолат қайтарилмаслигини билдирган. Мактаб раҳбарияти ўқитувчига педагогга хос бўлмаган ҳаракатларни содир этгани учун 2024 йили 28 декабрь куни тегишли тартибда интизомий жазо чорасини қўллаган.
Мактабдаги жанжаллар
Аввалроқ Сирдарёда ўқитувчи 1-синф ўқувчисини қўлига игна санчиш билан жазолангани ҳақида хабарлар тарқалганди. Суриштирув давомида юқоридаги ҳолат тасдиғини топмаган.
Қашқадарёнинг Шаҳрисабз туманидаги мактабда ўқитувчи 5-синф ўқувчисини уриб жароҳатлади. Қарши шаҳридаги мактабда ўқитувчи ва ўқувчи ёқалашгани тасвирлари тарқалди. Алгебра фани ўқитувчиси ва 10-синф ўқувчиси бўлган икки қиз ўртасида ўзаро келишмовчилик келиб чиқиб, оғзаки тортишиб қолган. Уларнинг хатти-ҳаракатларига чора кўриш учун судга берилган.
Тошкентдаги мактабда аёл дастлабки иш кунида ўқувчини калтаклагани ҳам кенг муҳокамаларга сабаб бўлганди. Аёл жазоланиб, мактаб директори ишдан олинганди.
Танганинг иккинчи томони: ўқитувчига тазйиқ ўтказиш ҳолатлари
2024 йилнинг октябрида Сирдарё туманидаги 2-мактабда икки ўқувчи қиз ўқитувчини урганди. Ўша йилнинг апрелида Фарғонада мактаб ўқитувчиси ўқувчининг қариндошлари томонидан калтакланганди. 2023 йилнинг майида Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди. Сентябрь ойида Сурхондарёда мактаб директори ўқитувчининг яқин қариндошлари томонидан калтакланганди. Мазкур ҳолатлар юзасидан ҳуқуқбузарларга қилмишидан келиб чиққан ҳолда жазо чоралари кўрилган.
Изоҳ (0)