“Болаларга ҳар қандай шаклда куч ишлатиш, жазолаб тарбиялаш асло мумкин эмас” — Ҳилола Умарова

Болаларга ҳар қандай шаклда куч ишлатиш, уларни турли усулларда жазолаб тарбиялаш асло мумкин эмас. Бу ҳақда мактабгача ва мактаб таълими вазири Ҳилола Умарова 6 март куни давлат ва нодавлат мактабгача таълим тизими масъуллари билан учрашувда айтиб ўтди.

Видеоконференция шаклида ташкил этилган мулоқотда республикадаги 38 мингдан ортиқ мактабгача таълим ташкилотлари раҳбарлари иштирок этди.

Кунора ижтимоий тармоқларда боғчаларда айрим тарбиячилар томонидан болажонларга нисбатан ишлатилган қўполлик, тарбиясизлик ҳолатлари акс этган видеолавҳа ва турли хабарлар тарқатилмоқда.

“Бир ҳақиқатни яхши англаб олишимиз зарур: болаларга ҳар қандай шаклда куч ишлатиш, уларни турли усулларда жазолаб тарбиялаш асло мумкин эмас. Буни тизимда ишлаётган ҳар бир раҳбар, педагог, тарбиячи ва ёрдамчи ходим бирдек тушуниши, шу тартибга риоя этишлари шарт”,  деди боғча раҳбарлари эътиборини ушбу салбий ҳолатларга қаратган вазир.

Қайд этилишича, биргина ўтган йилнинг ўзида айни шу масалада вазирликка юзлаб мурожаатлар келиб тушган. Натижада 32 нафар раҳбар ва тарбиячи лавозимидан озод этилди, 3 нафари жавобгарликка тортилди, 15 нафарига интизомий чора кўрилди, 15 та хусусий боғчага берилган лицензия бекор қилинган.

“Таълим-тарбия куч ишлатишдан ҳоли бўлиши лозим. Болаларга нисбатан қўполлик қилган ёки шафқатсизларча муносабатда бўлган тарбиячи, педагогга қонун доирасида чора кўрилади. Узр, огоҳлантиришлар билан қутилиб қолиш йўқ”, деди Ҳилола Умарова.

Унинг таъкидлашича, бу ўринда МТТ раҳбариятининг шахсий жавобгарлиги ҳам кучайтирилади.

“Таълим давлат ёки хусусий секторда бўлиши мумкин, лекин ҳар қандай ҳолатда ҳам бу болалар бизнинг фарзандларимиз, шуни ёдда сақлашингиз зарур. Бу сиёсатни тўғри тушунмаган, бунга амал қилмаган ҳар қандай ходим тизимдан бутунлай четлатилади, ҳар қандай тадбиркор билан ҳамкорликни тўхтатишга мажбур бўламиз. Лицензия талабларига ҳамда оилавий боғчаларнинг битимларига бундай ҳолатлар бўйича қатъий талаблар киритилади”, деди Ҳилола Умарова.

Мактабгача ва мактаб таълими вазири ҳар бир бола ўзини боғчасида эркин, хавфсиз ва қувноқ ҳис қилишини, унга барча шароитлар яратилишини хоҳлашини таъкидлаб, ҳар бир бола учун боғчаларда “хавфсиз ва қулай муҳит” бўлишини талаб қилди. Ҳилола Умарова барча масъулларни ўз ишига янада масъулият ва эътибор билан қарашга ундади.

Сўнгги ойларда боғчаларда болаларга нисбатан қилинган қўпол муносабатлар

2025 йил 14 февраль куни Самарқанднинг Жомбой туманидаги боғчада тарбиячи болаларни уриб, уларни ҳақоратлагани учун жаримага тортилиб, ишдан кетганди. 28 февраль куни Тошкент вилоятининг Паркент туманидаги боғчада тарбиячи болаларнинг қулоғидан тортиб, юз ва бош қисмларига бир неча маротаба ургани аниқланди. 21 февралда Тошкентдаги боғчада бола стулга скотчлаб қўйилгани ортидан тарбиячи ва унинг ёрдамчиси ишдан бўшатилди. 6 февраль куни Сирдарё вилояти Сардоба туманидаги боғчада 6 ёшли боланинг танасига игна санчиб, таҳдид қилингани аниқланди. 6 январда Тошкент вилоятидаги боғчада тарбиячи болаларнинг қулоғидан тортиб, бир неча маротаба ургани аниқланиб, ишдан олинди.