Навоий вилояти Кармана туманидаги 15-мактаб ўқувчиси фарзандли бўлгани ҳақида хабарлар тарқалди. Ҳолат юзасидан Мактабгача ва мактаб таълими вазирлиги “Дарё”га маълумот берди.
Унга кўра, айни вақтда мазкур ҳолат юзасидан ҳуқуқни муҳофаза қилувчи органлар томонидан ўрганиш ўтказилмоқда. Шунингдек, мактаб директори она бўлган ўқувчига айрим фанлардан дарсга иштирок этмаса ҳам баҳо қўйиб боргани айтилган эди. Вазирлик айрим фанлардан ўқитувчиларнинг дарсга иштирок этмаган ўқувчига баҳо қўйиб боргани ҳақидаги важлар айни вақтда вилоят Мактабгача ва мактаб таълими бошқармаси масъуллари томонидан ўрганилаётганини таъкидлади.
Шу каби ҳолат Самарқанд вилоятида ҳам кузатилганди. Самарқанд вилоятидаги мактабнинг 8-синф ўқувчиси, 2009 йилда туғилган П.З. 2023 йил август ойида ўзига аввалдан таниш бўлган, 2006 йилда туғилган Ш.Э. билан яқин муносабатда бўлган. 2024 йил 6 май куни шифохонада чақалоқ дунёга келтирган.
Шунингдек, 2023 йил январь–июнь ойларида Ўзбекистоннинг 5 та ҳудудида 6 нафар мактаб ўқувчисида эрта ҳомиладорлик ҳолатлари аниқланган. Мактабгача ва мактаб таълими вазирлиги бошқарма бошлиғи ўринбосари Азамат Камоловнинг айтишича, ўқувчиларда эрта ҳомиладорлик дарсдан ташқари вақтларда содир бўлган.
Изоҳ (0)