Ижтимоий тармоқларда боғчаларнинг бирида тарбиячи болаларни ургани акс этган видео тарқалди. Ҳолат юзасидан вилоят Мактабгача ва мактаб таълими маълумот берди.
Унга кўра, мазкур ҳолат туман мактабгача ва мактаб таълими бўлим томонидан ишчи гуруҳ тузилиб, ўрганиш ишлари олиб борилган. Ҳолат жорий йилнинг 6 январь куни Паркент туманидаги 19-сонли давлат мактабгача таълим ташкилотида кечги соат 17:00 лар атрофида содир бўлган.
Муассасада жисмоний тарбия йўриқчиси вазифасида фаолият юритадиган П.А. тарбияланувчиларни гимнастика таёқчаси билан туртиб, қаторга туришга ундаган. Ўрганишлар давомида ташкилотнинг тарбиячиси Ш.М. ҳам болалар билан қўпол муносабатда бўлгани аниқланган.
Қайд этилишича, мазкур ҳолатлар атрофлича ўрганилиб, муассасанинг жисмоний тарбия йўриқчиси П.А. ҳамда тарбиячи Ш.М. билан тузилган шартнома меҳнат кодексининг 157-моддасига асосан бекор қилинди.
Шунингдек, болалар омбудсмани ҳам ҳолатга муносабат билдирган. Унга кўра, 28 февраль куни Паркент туманидаги болалар боғчасида тарбиячи А.П. томонидан тарбияланувчилар З.Р. (2018 йилда туғилган, қиз бола) ва С.М. (2019 йилда туғилган ўғил бола)ларнинг қулоғидан тортиб, юз ва бош қисмларига бир неча маротаба ургани видеоёзувда қайд қилинган.
Ҳолат юзасидан ҳозирда терговга қадар текширув олиб борилмоқда, вояга етмаган болаларга нисбатан тан жароҳати етказилгани фактини аниқлаш мақсадида судга оид экспертиза тайинланган.
Боғчалардаги шу каби ҳолатлар
Бундан аввал Сирдарёдаги боғчада 6 ёшли боланинг танасига игна санчиб, таҳдид қилинган эди. Шунингдек,
- Нукусдаги хусусий боғчада болаларга қўполлик қилингани аниқланди
- Сергелидаги боғчада тарбиячининг калтаклаши оқибатида боланинг оёғи синди
- Тошкентда 6 ёшли болага қизлар кийимини кийдириб, аёллар рақсини ижро эттирган боғча тарбиячиси ишдан бўшатилди
- Хоразмда тарбиячи болаларни қарғаган видеосини адашиб ота-оналар гуруҳига жўнатиб юборди
- Тошкентдаги хусусий боғчада тарбиячи болани уриб, ҳақоратлади
- Сурхондарёдаги боғчада 5 ёшли болани урган тарбиячи ишдан олинди
- Жиззахда 3 ёшли боғча боласининг ўлимига сабабчи бўлганларга суд ҳукми ўқилди
Бундан ташқари, Самарқандда боғчадаги болалардан бири 3 ёшли қизнинг қўлларидан тишлаб, жароҳат етказгани, Андижондаги боғчада тарбиячи боланинг юзига бир неча бор тарсаки туширгани тўғрисида хабар берилганди.
Изоҳ (0)