Андижон вилояти Олтинкўл туманида Damas йўлдан югуриб ўтаётган 10 ёшли болани уриб юборди. Бу ҳақда вилоят ЙҲХБ хабар берди.
Маълум қилинишича, ҳолат 25 февраль куни соат 14:30 ларда Олтинкўл тумани “Топтиқ” МФЙ ҳудудидан ўтган, Фарғона ҳалқа йўли автомобиль йўлининг 124-километрида содир бўлган. 1999 йилда туғилган С.И. ўзининг Damas’ини бошқариб кетаётиб, қатнов қисмининг белгиланмаган жойидан кескин югуриб ўтган, 2015 йилда туғилган пиёдани уриб юбориб, йўл-транспорт ҳодисаси содир қилган.
Ушбу ЙТҲ оқибатида пиёда олган тан жароҳати билан туман шошилинч тез тиббий ёрдам марказига ётқизилган.
Мазкур ҳолат юзасидан, Олтинкўл тумани ИИБ тергов бўлими ходимлари томонидан ҳозирда тергов ҳаракатлари олиб борилмоқда.
Йўлларда болалар ўлими
Ноябрь ойида Жиззах вилоятининг Бахмал туманида Cobalt катта тезликда вояга етмаган икки қизни уриб юборди. Шунингдек, Самарқандда автобус мактаб яқинида йўлни кесиб ўтаётган болани уриб юбориб, унинг ўлимига сабаб бўлганди. Сурхондарёда 1-синф ўқувчиси Nexia уриб юборишидан вафот этганди.
Сенат берган маълумотга кўра, 2024 йилнинг 5 ойи давомида жами 359 нафар ўқувчи билан боғлиқ йўл-транспорт ҳодисаси содир этилган ва 65 нафар ўқувчи ҳалок бўлган, 294 нафар ўқувчи эса турли даражада тан жароҳатлари олган. 2023 йилда болалар билан боғлиқ 1 794 та ЙТҲ юз бериб, уларда 1 568 нафар бола жароҳатланган, 263 нафари вафот этган.
Сентябрда Тошкентда BYD 9 ёшли мактаб ўқувчисини уриб юбориб, унинг ўлимига сабабчи бўлганди. Худди шу каби ҳолат июль ойида Навоий вилояти Хатирчи туманида содир бўлган. Катта тезликда ҳаракатланаётган BYD пиёдалар ўтиш жойидан ўтаётган 9 ёшли қизалоқни босиб кетган. Ўша ойда Самарқандда 7 яшар бола автомобиль уриб кетиши оқибатида вафот этди. Апрелда Жиззахда содир бўлган ЙТҲ оқибатида икки нафар мактаб ўқувчиси ҳалок бўлди.
Болалар иштирокида аянчли ЙТҲлар кўпайгач, жамоат фаоллари йўлларда болалар ўлими учун сиёсий жавобгарлик бўлиши кераклигини айтди.
Изоҳ (0)